Tragjedi në Belgjikë: Treni godet autobusin e shkollës, 4 të vdekur!

Katër persona, përfshirë dy fëmijë, kanë humbur jetën pasi treni e goditi një autobus shkolle në veri të Belgjikës. Kryeministri belg Bart De Wever tha se është “thellësisht i prekur nga aksidenti i tmerrshëm… Në këto çaste bashkëndiejmë me familjet e prekura”, shkroi ai.

Pamjet nga vendngjarja në rajonin e Flandrës shfaqin autobusin e rrokullisur dhe dëmtuar në skaj të një rruge pranë vijës hekurudhore. Treni i udhëtarëve mbeti i ndalur mbi shina. Zëdhënësja e Policisë, An Berger, u tha mediave belge se në autobus ndodheshin shtatë fëmijë, një mbikëqyrës dhe shoferi, duke shtuar se askush në tren nuk ishte lënduar.

Autoritetet thanë se treni po udhëtonte rreth 120 kilometra në orë kur ndodhi aksidenti. “Autobusi u hodh rreth 15 metra drejt një shtylle metalike”, tha zëdhënësi i agjencisë hekurudhore belge. Sipas tij pamjet nga vendi i ngjarjes tregonin se barrierat në kalimin hekurudhor kishin qenë të mbyllura dhe se semafori i kuq ishte ndezur në momentin e aksidentit. Mediat belge raportuan se nxënësit vinin nga një shkollë për fëmijë me vështirësi në të nxënë.

/alsatm