TËRMETI/ Për hajër! Rama: turqit në Laç e së shpejti arabët në Durrës, nis rindërtimi

Kryeministri Rama njoftoi nisjen e ndërtimit të lagjeve të reja në Laç, pjesë e projektit të 500 banesave të financuara nga Turqia.

“PËR HAJËR!

Ja ku filloi edhe ndërtimi në terren i lagjes së parë për familjet që humbën strehën në tragjedinë e 26 nëntorit! Them ndërtimi në terren, sepse shumëkush në këtë faqe nuk do që ta kuptojë, se ndërtimi ka nisur prej kohësh me projektimin, i cili merr kohën e vet nga planifikimi, dizajni arkitektonik, projekt-zbatimi, studimi gjeologjik – plus në këtë rast procesi i shpronësimeve dhe miratimi i marrëveshjes me kompaninë e donatorit, ndërkohë për ndërtimet me fondet e buxhetit të shtetit, do kohën e vet edhe procedura e garës deri tek kontrata me sipërmarrjen fituese”, ka shpjeguar shefi i qeverisë.

Sipas tij, duhet marrë parasysh se pandemia pengoi jo pak Rindërtimin.

“Disa e harrojnë ose duan ta harrojnë, se në rrugën e Rindërtimit hasëm për dreq edhe Covidin, që na hëngri jo pak kohë të çmuar dhe na i shtyu me detyrim kalendarët e realizimit të Programit të Rindërtimit.

Sidoqoftë, sot në Laç nisën gërmimet dhe tanimë puna nuk do të ndalojë deri në dorëzimin e apartamenteve e të njësive tregtare nga miqtë turq, për zonën 1, ndërkohë që për zonën 2, e cila do të financohet nga buxheti i shtetit, po finalizohet procesi përpara hapjes së kantierit”, shkruan Rama.

Ai paralajmëron se pas turve, është radha e arabëve të Emirateve që të hapin kantieret e Rindërtimit në Durrës.

“Së shpejti hapen kantieret edhe në Durrës, me lagjen e re në Spitallë dhe pallatet e reja në pikat e ndryshme të qytetit, ku u shembën të vjetrit. Në kantieret e Durrësit, që financohen nga Emiratet e Bashkuara, do të punojë një kompani prestigjoze nga Dubai, me të cilën po bashkëpunojmë ngushtësisht prej muajsh për projektet.

Kavaja e Fushë – Kruja kanë nisur në terren me infrastrukturën ku do të ngrihen pallatet e reja, e së shpejti nisin të gjitha. Edhe pak durim dhe çdokush që pret apartamentin e ri, do të mund ta ndjekë me sy pallatin e vet të ri teksa hedh shtat”, përfundon njoftimin e tij i pari i qeverisë.

Kujtojmë se pak ditë pas tërmetit të 26 nëntorit, Turqia ishte e para që premtoi ndërtimin, sigurisht falas, të 50 banesave, si dhe organizimin e një Konference Donatorësh me vendet muslimane. Këto të fundit janë ndër financueset më të mëdha të Rindërtimit. /tesheshi.com/

VIDEO:

/shenja