Taravari i thotë “PO” rrugëtimit me opozitën..

Kreu i Aleancës për Shqiptarët Arben Taravari i thotë “PO” rrugëtimit me opozitën shqiptare, Lidhjen Evropiane për Ndryshim. Ai thotë se populli e do ndryshimin dhe kërkon një sistem të çliruar nga epidemia e korrupsionit që është bërë frenuesi më i madh për mirëqenien dhe zhvillimin e shqiptarëve në Maqedoninë e Veriut. Taravari i bëri thirrje Kuvendit të ASH-së për mbështetje në rrugëtimin e ndryshimit.

“Në cilësinë e kryetarit të Aleancës për Shqiptarët, ftoj publikisht Kuvendin e partisë të më mbështesë në këtë rrugëtim dhe bashkë, t’i prijmë këtij procesi që unë e quaj ndryshimi i madh dhe i shumëpritur! Asnjëherë ky ndryshim nuk ka qenë më i sigurt dhe më i prekshëm. Askush nuk ka kredibilitet më të madh se Aleanca për ta sjellë këtë ndryshim! Ne jemi në rrugën tonë, jemi në rrugën e trasuar nga Arben Xhaferi. Kjo rrugë do të na çojë aty ku përkasim, në familjen e madhe evropiane, gjithnjë duke kultivuar aleancën tonë të përhershme me SHBA dhe NATO me të cilët ndajmë të njëjtin vizion dhe të njëjtat vlera.

Duke besuar pa lëkundje në bashkëpartiakët e mi dhe në vizionin tonë të përbashkët, kërkoj besimin e tyre që Aleanca për Shqiptarët të futet në garën zgjedhore me opozitën shqiptare, e bashkë më tej të bëjmë më të mirën për këtë vend! Shumica e lexon historinë, por rrallë ka raste ku të jepet mundësia ta shkruash atë. Sot këtë mundësi e kemi para nesh. Le të jemi ne ata që do e shkruajnë historinë”, shkruan Taravari.

Në arsyetimin e tij kreu i Aleancës për Shqiptarët thotë se qëndrimi vjen pas konsultimeve dhe takimeve të shumta, si dhe një reflektimi të thellë personal.
“Duke marrë parasysh sugjerimet sa të vlefshme aq edhe dashamirëse të të gjithë miqve, anëtarëve dhe përkrahësve, kam zgjedhur të dëgjoj edhe zërin e popullit që sot po flet më qartë se kurrë”, thekson Taravari.

Këtë periudhë Taravari kishte komunikime intensive me liderët e opozitës shqiptare, përkatësisht kreun e Besës Bilall Kasami, atë të Lëvizjes Demokratike, Izet Mexhiti dhe atë të Alternativës Afrim Gashi. Takimi i fundit i tyre i përbashkët ishte me kryeministrin e Kosovës dhe njëherësh lider i Vetëvendosjes Albin Kurti në Prishtinë. Pas këtij takimi u konfirmua se kreut të ASH-së i ishte ofruar që të jetë kandidat për president në zgjedhjet e prillit, por ai deklaroi se nuk ishte i interesuar për këtë kandidaturë.

Taravari paraprakisht takoi edhe kryeministrin shqiptar Edi Rama, ndërsa ditëve të fundit takoi edhe liderët e koalicionit qeverisës atë të LSDM-së Dimitar Kovaçevski dhe të BDI-së, Ali Ahmeti. Informacionet për bashkëngjitjen e Taravari koalicionit opozitar u intensifikuan pas bërjes publike të vendimit të kryesisë së Aleancës për Shqiptarët që në zgjedhje të garohet më vete. Prej asaj periudhe parlajmërohej mbajtja e mbledhjes së Kuvendit të ASH-së për të marrë vendimin përfundimtar, por një takim i tillë nuk ndodhi.

/Alsat.mk