Taravari dorëzoi padi për shpifje kundër Izet Mexhitit, i cili e quajti ministër të kanabisit?

Kryetari i Aleancës për Shqiptarët, Arben Taravari, përmes avokatit të tij Abidin Abduli, ka dorëzuar dje padinë për shpifje në Gjykatën Themelore Shkup 2 kundër kryetarit të Komunës së Çairit, Izet Mexhiti, transmeton Portalb.mk.

Padia vjen pas deklaratave të bëra nga Mexhiti në një emision televiziv në Lajm TV, ku ai tha se gjatë mandatit të tij si ministër, Taravari ka dhënë shtatë licenca për fabrika për përpunimin e kanabisit.
Sipas njoftimit, para dorëzimit të padisë ishte dhënë edhe afati ligjor për kërkim-falje publike, të cilin Mexhiti, thonë nga ASH, nuk e ka shfrytëzuar.

Taravari i ka mohuar kategorikisht këto akuza, duke i cilësuar si të pavërteta dhe shpifëse. Ai kishte paralajmëruar më herët se do të ndërmerrte hapa ligjorë nëse nuk do të kishte kërkim-falje publike për deklaratat e bëra.
Me dorëzimin e padisë në Gjykatën Themelore Shkup 2, çështja tashmë pritet të marrë rrugë institucionale.

Taravari ishte Ministër i Shëndetësisë nga qershori 2024 deri në maj 2025, kur u largua nga koalicioni VLEN dhe kandidoi në zgjedhjet lokale në koalicion me BDI-në.
Dy ditë më parë, Qeveria vendosi të kryejë kontrolle të jashtëzakonshme në të gjitha subjektet juridike dhe objektet që kanë marrë licenca për kultivimin e marijuanës për qëllime mjekësore.

Kjo vjen pasi ministri i Brendshëm Pançe Toshkovski, së bashku me kryeministrin dhe disa nga strukturat drejtuese në Ministrinë e Brendshme, treguan një pjesë të marijuanës që u sekuestrua në disa vende në vend javën e kaluar.

Sipas Toshkovskit, një komision nga Ministria e Shëndetësisë ka arritur në përfundimin se marihuana është trajtuar ilegalisht, domethënë se është prodhuar, ruajtur dhe mbajtur jashtë protokolleve të përcaktuara.
Deri më tani, nuk ka pasur asnjë urdhër nga Prokuroria Publike për hetimin e marihuanës, as ndonjë të dyshuar në rastin e marihuanës së sekuestruar.

/portalb