Studimi: 40% e rasteve të reja të kancerit në botë mund të parandalohen ?

Pothuajse 40 përqind e rasteve të reja të kancerit në botë mund të parandalohen, sipas një studimi të publikuar në Nature Medicine. Hulumtimi, që analizoi 36 lloje kanceresh në 185 vende për vitin 2022, tregon se pirja e duhanit është faktori kryesor i rrezikut, e ndjekur nga infeksionet dhe konsumimi i alkoolit.

Nga 18.7 milionë raste të reja globale, rreth 7.1 milionë lidhen me shkaqe të parandalueshme. Kanceret e mushkërive, stomakut dhe qafës së mitrës përbëjnë gati gjysmën e këtyre rasteve. Rajonet me të ardhura të ulëta dhe të mesme preken më shumë nga infeksionet, ndërsa në vendet e pasura dominon ndikimi i duhanit.

Studimi synon të ndihmojë në krijimin e strategjive më efektive të parandalimit të kancerit, të përshtatura sipas rajoneve dhe faktorëve kryesorë të rrezikut.

/euronews