Sot 40 vite nga Çernobili! Shpërthimi bërthamor që tronditi Eurpën

Më 26 prill 1986, në orën 01:23 të mëngjesit, në centralin bërthamor të Çernobilit në Ukrainë shpërtheu një nga reaktorët, duke shkaktuar aksidentin më të madh bërthamor në historinë e shekullit të 20-të.

Pas shpërthimit, një re radioaktive u përhap me shpejtësi në disa vende të Evropës, përfshirë Bjellorusinë, Rusinë, Skandinavinë, Poloninë, Gjermaninë dhe Ballkanin.
Në disa zona u raportua edhe rënie shiu i kontaminuar, ndërsa ndotja preku pjesë të mëdha të hemisferës veriore.

Autoritetet e Bashkimit Sovjetik në atë kohë e mbajtën ngjarjen të fshehtë për disa ditë, duke mos dhënë informacion të plotë për rrezikun.
Mungesa e njoftimeve bëri që shumë njerëz të konsumonin ushqime të kontaminuara pa dijeni, përfshirë qumësht dhe perime të shpërndara në disa vende të Evropës Lindore.

Në disa shtete komuniste u raportua mungesë informacioni për publikun, ndërsa masat mbrojtëse u morën vonë ose nuk u komunikuan qartë. Në disa raste, fëmijëve iu shpërndanë tableta me jod si mbrojtje ndaj rrezatimit.

Edhe sot, pas 40 vitesh, nuk ka shifra të sakta për numrin e viktimave dhe pasojat afatgjata shëndetësore mbeten të debatueshme. Disa vlerësime flasin për mijëra viktima si pasojë direkte dhe indirekte të rrezatimit.

Çernobili mbetet një nga ngjarjet më të rënda teknologjike dhe mjedisore në botë, me pasoja që ndihen ende në disa zona të prekura.

/ts