Sonte në Kërçovë fillon edicioni i katërt i festivalit “Uskana Fest”

Duke filluar nga sot (10 dhjetor) deri më datë 14 dhjetor 2024, çdo natë nga ora 19:30, publiku kërçovar do të ketë mundësi të shoqërohet me programin e pasur të festivalit “Uskana Fest” e cila sjell poezi, teatër e shumë emocione te publiku, njofton Portalb.mk.

Në Shtëpinë e kulturës në Kërçovë sonte fillon edicioni i katërt me radhë i festivalit “Uskana Fest” që është një festë e vërtetë për Kërçovën si qytet. Për pesë net me radhë publiku do të shoqërohet me ngjarje të ndryshme të parapara me program, edhe atë:

Në natën e parë do të prezantohet Teatri i Gostivarit me shfaqjen “Shërbëtori i dy partive” nën regji të Besfort Idrizit.
Në natën e dytë do të prezantohet Teatri Shqiptar Shkup me shfaqjen “Vdekja dhe Virgjeresha”.
Nata e tretë Shoqata “Eduinfo”-Shtip “Nero”.
Nata e katërt është rezervuar për Teatrin e Kumanovës me shfaqjen “Burri me papuçe”.
Dhe nata e fundit dhe e pesta është për Teatrin “Tempulli”-Shkup me shfaqjen “Detektori i gënjeshtrave”.
Drejtori i festivalit Rrahim Ramadani për Portalb.mk tha se janë përpjekur që edhe këtë vit të sjellin një laramani shfaqjesh dhe zhanresh për të kënaqur publikun kërçovar me një kolorit shfaqesh të teatrove vendore më të mira.

“Po bëhemi gati që ta nisim me këmbë të mbarë edicionin e katërt me radhë të festivalit të teatrove “Uskana Fest”. Jemi përpjekur që edhe këtë vit të sjellim laramani shfaqesh dhe zhanresh për të kënaqur publikun kërçovar me një kolorit shfaqesh të teatrove vendore më të mira”, tha Ramadani.

Se çfarë risi e presin publikun, Ramadani tha:
“Sa u përket risive kënaqësia jonë më e madhe është interesimi i madh i vullnetarëve që çdo vit shtohet me intensitet të madh. Njëlloj, këtë vit janë rreth 50 vullnetarë e njëjta ndodh edhe me publikun e përkryer kërçovar, që shpreh interesim të madh për teatrin”, tha Ramadani.

Ramadani tha se edhe kësaj here kanë pasur mbështetje për realizimin e këtij edicioni.
“Mbështetjen e kemi gjetur gjithmonë edhe te Komuna e Kërçovës edhe te Ministria e kulturës dhe Turizmit të RMV. Por edhe te disa sponsor privat që ndihmojnë shumë në realizimin e festivalit të vetëm të teatrove në Kërçovë”, tha Ramadani.

Ngjarje të tilla shërbejnë jo vetëm për nxënësit dhe studentët e aktrimit që vinë nga qytete tjera, po edhe për vet publikun që përcjell këto shfaqje dhe gjallërojnë jetën kulturore në përgjithësi. Aktivitete të tilla i dëshiron çdo qytet.

/portalb.mk