Si zëvendëskryeministri Fetai dhe ministri Limani u “rikonstruuan” vetë?!

Emisioni “360 gradë” nuk arriti ta kontaktojë zëvendëskryeministrin Arben Fetai, pasi sipas deklaratës së bashkëpartiakut të tij dhe ministrit të Shëndetësisë Azir Aliu, ai nuk merr pjesë në mbledhjet e Qeverisë dhe nuk ndodhet në vend. Për angazhimin e punës së Fetait, nga Qeveria u është sugjeruar të kontaktohet drejtpërdrejt ai.

Ministri i Politikës Sociale, Demografisë dhe Rinisë, Fatmir Limani, ka aktivitete të rregullta si anëtar i Qeverisë. Megjithatë, sipas deklaratave të bashkëpartiakëve të tij, për të nuk ka vend në VLEN-in e ardhshëm, e cila më 9 maj pritet të shndërrohet në parti, pas së cilës pritet edhe një rikonstruim i Qeverisë.

Ky është profili në Facebook i zëvendëskryeministrit për qeverisje të mirë, Arben Fetai. Në shkurt të këtij viti ai ka pasur gjithsej 26 postime. Disa prej tyre lidhen me aktivitetet e tij si funksionar qeveritar, si për shembull postimi i 2 shkurtit për fillimin e punës së Komisionit Nacional për hetime financiare dhe konfiskim të pasurisë. Të tjera janë nga paraqitjet e tij në media, si postimi i 20 shkurtit. Ka gjithashtu edhe angazhime partiake, takime, si dhe ndonjë koment apo urim.

“360 shkallë” ka kontaktuar edhe ministrin Fatmir Limani. Atij i janë drejtuar personalisht disa pyetje – për arsyet, sipas Kasamit, të ndërprerjes së komunikimit me BESA-n dhe VLEN-in; nëse pret të mbetet në qeverinë e Hristijan Mickoskit; si dhe nëse do ta vazhdojë dhe në çfarë forme veprimtarinë e tij politike. Deri në mbylljen e kësaj storie, përgjigje nuk është marrë.

Promovimi i partisë VLEN është paralajmëruar për rreth 15 ditë. Menjëherë pas kësaj, sipas njoftimeve, pritet edhe një rikonstruim i Qeverisë. Sinjalet janë mjaft të qarta se do të ketë lëvizje në nivelin e parë të pushtetit, përfshirë edhe pozicionet brenda VLEN-it.

/ts