Shqiptarët nuk ngrihen nga kafeja as kur rritet çmimi i sajë !

Kafeja vazhdon të mbetet pjesë e pandashme e përditshmërisë së shqiptarëve, pavarësisht se çmimi i saj po rritet ndjeshëm vit pas viti. Të dhënat e INSTAT tregojnë se vetëm gjatë tetorit, rritja e çmimeve për “kafe, çaj dhe erëza” ka qenë 7.1% krahasuar me një vit më parë.

Megjithatë, kjo nuk e ka ndalur konsumin. Në 10 muajt e parë të vitit, shqiptarët kanë konsumuar 6.7 mijë tonë kafe, një rritje prej 3.5% krahasuar me të njëjtën periudhë të vitit të kaluar. Kjo shifër është ndër më të lartat e regjistruara që nga viti 2018, duke treguar se kafeja mbetet pjesë e pazëvendësueshme e jetës së përditshme.

Sociologët shprehen se pirja e kafes ka evoluar në një ritual të përditshëm, ku qytetarët ndajnë shqetësimet e tyre, bisedojnë dhe shpesh zgjidhin situata të ndryshme përmes këtyre takimeve. “Kafeja është bërë pjesë thelbësore e bareve dhe restoranteve, që janë vendet më të zakonshme në të gjithë Shqipërinë. Shqiptarët gjejnë tek këto pika një mundësi për të biseduar, për të kaluar kohë me të tjerët dhe për të kryer marrëveshje të ndryshme,” shprehen ata.

Në Shqipëri, kafenetë nuk janë thjesht vende për të pirë kafe. Ato janë pika takimi dhe reflektimi për të rinjtë dhe profesionistët, pjesë e rëndësishme e stilit të jetesës. Konsumimi i kafes është më shumë se një zakon i përditshëm; është një simbol i mikpritjes dhe i jetës sociale, një traditë që ruhet ndër breza dhe që ka çuar konsumin në nivele historike.

Edhe pse çmimet vazhdojnë të rriten, shqiptarët duket se nuk heqin dorë nga rituali i tyre i përditshëm: një filxhan kafe mbetet i pandashëm nga mëngjesi i tyre dhe momentet e përbashkëta me të tjerët.

/joq