Shqipëria po zbrazet nga vendasit dhe po mbushet me të huaj ?

Shqipëria po përjeton një rritje të shpejtë dhe të pazakontë të numrit të shtetasve të huaj, duke u shndërruar nga vend emigrimi në një vend pritës, pa një debat publik apo strategji të qartë shtetërore. Deri në fund të vitit 2025, mbi 27,500 të huaj jetonin në vend me leje qëndrimi, 22% më shumë se një vit më parë, ku 65% e tyre janë për arsye punësimi, një tregues i drejtpërdrejtë i mungesës së fuqisë punëtore vendase.

Struktura e emigracionit ka ndryshuar ndjeshëm. Krahas Kosovës dhe Italisë, po dominojnë gjithnjë e më shumë shtetas nga India, Filipinet dhe Egjipti, të përqendruar kryesisht në sektorë me paga të ulëta si shërbimet, hoteleria dhe bujqësia. Vetëm nga India dhe Filipinet numri i të huajve u rrit mbi 100% në një vit, duke sinjalizuar një zëvendësim të fuqisë punëtore shqiptare me emigrantë nga vendet jashtë BE-së.

Rritja e aplikimeve të reja për leje qëndrimi, me 47% në 2025, tregon se ky fenomen nuk është i përkohshëm, por po merr trajta strukturore. Në mungesë të politikave të integrimit, kontrollit të tregut të punës dhe transparencës mbi ndikimin social e ekonomik, Shqipëria rrezikon të përballet me tensione të reja sociale dhe deformim të tregut të punës në afatmesëm.

/joq