Shqipëria dhe Ballkani përfshihen nga temperaturat ekstreme, Parashikimi nga Tanja Porja per sot dhe 5 ditët në vijim

Mëngjesi i sotëm nuk sjell ndryshime domethënëse në aspektin termik: temperaturat minimale do të variojnë nga 15°C në zonat malore të thella deri në 25°C përgjatë bregdetit.

Në mesditë, pritet një tjetër rritje e ndjeshme, ku maksimumet në rang vendi do të shkojnë nga 30°C deri në 40°C, madje në disa zona edhe mbi 40°C.
Era do të vijojë me intensitet mesatar, me drejtim nga verilindja dhe veriperëndimi, përgjatë gjithë 24 orëshit.

Sot Shqipëria do të mbizotërohet nga kthjellime, me përjashtim të ndonjë vranësire të lehtë në veri dhe verilindje. Vlera minimale për mëngjesin ruhet rreth 15°C në zonat e thella malore, ndërsa përgjatë vijës bregdetare variojnë nga 21°C në brendësi deri në 25°C në zona të izoluara.

Në pjesën e dytë të ditës, pritet shtim gradual i vranësirave në veri e më pas në zonat qendrore. Megjithatë, jugu i vendit do të vijojë i kthjellët. Temperaturat maksimale për zonat malore do të luhaten nga 31°C në juglindje deri në 37°C në verilindje. Në bregdet, termometri ngjitet pranë 38°C, ndërsa në disa qytete si Tirana, Elbasani, Shkodra, Kopliku, Berati, Gjirokastra dhe Fieri priten vlera nga 39 deri në mbi 40°C.

/ms