Shoqata nga Vjena – Austri: Kërçova të mbetet e kërçovarëve!

Thirrje drejtuar subjekteve politike për Kërçovën

Zgjedhjet komunale po afrohen dhe procesi i paraqitjes së kandidaturave për kryetar komune ka nisur. Në këtë prag të rëndësishëm, lind një pyetje thelbësore: Cilit kandidat apo cilës parti do t’ia besojnë votën qytetarët e Kërçovës?

Për shumicën e mërgimtarëve që jetojnë dhe veprojnë në vende të ndryshme të botës, nuk ka rëndësi emri apo ngjyra politike e kandidatit fitues. Ajo që vërtet ka rëndësi është që Kërçova të udhëhiqet nga një kryetar me integritet, vizion dhe aftësi, i cili përfaqëson denjësisht interesat e të gjithë kërçovarëve – si atyre brenda komunës, ashtu edhe atyre që jetojnë jashtë saj.

Interesi i përgjithshëm duhet të mbizotërojë mbi çdo interes personal apo partiak.

Mërgata nuk duhet të shihet thjesht si një burim votash për periudhën zgjedhore dhe më pas të harrohet për katër vite. Ajo ka dhënë dhe vazhdon të japë një kontribut të çmuar për vendlindjen dhe duhet të bëhet pjesë aktive e zhvillimeve në Kërçovë, duke ndjekur e mbështetur suksesin kolektiv që sjell përfitime për të gjithë.

Deri më sot, diaspora ka pasur kërkesa të pakta ndaj partive politike në rajon, por në të ardhmen synon të luajë një rol më aktiv dhe të ketë ndikim real në vendimmarrjet që lidhen me të ardhmen e komunës.

Megjithëse dashuria për vendlindjen është e pakufishme, pjesëmarrja e diasporës në zgjedhje do të jetë e ulët në rast se në garë paraqiten më shumë se një kandidat shqiptar.
Prandaj, Shoqata Humanitare “Kërçova” në Vjenë, në frymën e unitetit dhe përgjegjësisë kolektive, i bën një thirrje të qartë të gjitha partive politike që veprojnë në rajon: Bashkohuni! Arrini një marrëveshje dhe paraqituni me një kandidat të përbashkët, që do të mbështetet nga të gjitha forcat politike shqiptare në këto zgjedhje komunale.
Vetëm nëpërmjet unitetit mund të garantohet një përfaqësim dinjitoz dhe një e ardhme më e ndritur për Kërçovën.

Me respekt
Kryesia e Shoqatës humanitare Kërçova