Shoqata Kulturore Uskana Dortmund pjesë e përvjetorit të partneritetit NRW – Maqedonia e Veriut

Shoqata Kulturore Uskana Dortmund, me ftesë të Ministrit për Çështje Evropiane Nathanael Liminski, mori pjesë në përvjetorin e partneritetit midis Rajonit të Nordrhein-Westfalen dhe Maqedonia e Veriut.

Aktiviteti u zhvillua në ambientet e Altes Rathaus Bonn, ku përfaqësuesit e shoqatës patën mundësi të njihen nga afër dhe të shkëmbejnë kontakte me organizatorët e projekteve në kuadër të NRW dhe Maqedonisë së Veriut, përfshirë edhe Servicestelle Kommunen in der Einen Welt (SKEW).

Gjatë këtij eventi, u zhvilluan takime të rëndësishme, ndër to një bisedë e shkurtër, por mjaft domethënëse me Kryetarin e Komunës së Bonn-it Guido Deus dhe ministrin Nathanael Liminski. Po ashtu, përfaqësuesit e shoqatës patën një takim të ngrohtë dhe vëllazëror me Ambasadorin Ylber Sela, i cili shprehu gatishmërinë për mbështetje të vazhdueshme.
Një falënderim i veçantë iu drejtua edhe Arbër Bajrami nga Zërat e Iliridës për mikpritjen dhe shoqërimin gjatë qëndrimit në Bonn.

Shoqata Kulturore Uskana Dortmund mbetet e përkushtuar në misionin e saj për të forcuar lidhjet e diasporës me vendlindjen, për të qenë urë lidhëse mes të rinjve në mërgim dhe atdhe, si dhe për të ruajtur e promovuar kulturën dhe vlerat tradicionale shqiptare, duke kontribuar në shmangien e asimilimit të brezave të rinj në diasporë.

/tvgurra