Shkolla duhet të jetë vendi ku fëmijët ndihen të sigurt ! Shkruan Prof. Dr. Lulzim Mehmedi

Dhuna në shkollë, nga kushdo që të vijë, qoftë nga nxënësi apo nga mësuesi, është e papranueshme. Shkolla duhet të jetë vendi ku fëmijët ndihen të sigurt, të respektuar dhe të mbrojtur, por edhe ku mësimdhënësit dhe stafi arsimor punojnë me dinjitet dhe pa frikë.

Në raste të tilla, është jetike të ruhet qetësia institucionale: të mos nxirren përfundime të nxituara pa u sqaruar faktet, të veprohet me përgjegjësi profesionale dhe të ndërmerren masa të drejta që situata të tilla të mos përsëriten.

Në një kohë kur edukata gjithnjë e më shpesh duket se është zhvendosur nga familja dhe shkolla, duke lënë hapësirë që ndikimi i rrugës dhe modeleve joformale të marrë rol dominues, kërkohet domosdoshmërisht një qasje e integruar dhe e qëndrueshme.

Kjo nënkupton angazhimin e pedagogëve, psikologëve dhe punëtorëve socialë, bashkëpunim të sinqertë e të vazhdueshëm me prindërit, si dhe realizimin e aktiviteteve dhe projekteve edukative me nxënësit, të fokusuara në parandalimin e dhunës, zhvillimin e empatisë dhe ndërtimin e një kulture të respektit të ndërsjellë.

Duhet të angazhohemi seriozisht dhe pa ndërprerje në parandalimin e të gjitha formave dhe llojeve të dhunës në shkolla, duke përfshirë si nxënësit ashtu edhe stafin mësimor. Vetëm përmes bashkëveprimit institucional dhe shoqëror mund të krijojmë mjedise shkollore të sigurta dhe mbështetëse.

Korniza ligjore në Republikën e Maqedonisë së Veriut, por në rastin konkret edhe në Kosovë, është e qartë: ajo mbron nga dhuna, diskriminimi dhe trajtimi jo dinjitoz jo vetëm nxënësit, por edhe mësimdhënësit dhe stafin profesional. Detyra jonë si institucione është ta zbatojmë këtë frymë në praktikën e përditshme.
Shkolla duhet të mbetet gjithmonë hapësira ku edukimi, respekti dhe siguria nuk janë vetëm fjalë, por vlera të jetuara çdo ditë.

/tvgurra