Sa raciste është policia gjermane?

Në Gjermani policia ka ende një reputacion relativisht të mirë, por Këshilli i Evropës shprehet për racizm të përhapur dhe institucional në Gjermani.

Vdekja e afro-amerikanit George Floyd ka hapur edhe në Gjermani një diskutim për çështjet e racizmit dhe të dhunës policore. Sipas shumicës së politikanëve policia në Gjermani në tërësi nuk ka asnjë problem racizmi. Por megjithatë ka raste që punonjës të organeve të rendit, ose nëpunës të tjerë të shtetit janë racistë të hapur, shkruan DW.

Një problem është për shembull, kontrolli nga policia i njerëzve pa ndonjë arsye specifike, por vetëm për shkak të ngjyrës së tyre të lëkurës ose karakteristikave të tjera të jashtme. Vërtetë që në Gjermani është i ndaluar ky i ashtuquajtur “racial profiling”, por gjithsesi ndodh.

Ministria e Drejtësisë dhe Ministria e Brendshme njoftuan në qershor se do të bëjnë një studim të pavarur për rastet e “racial profiling” në organet e policisë dhe të drejtësisë, por ministri federal i Punëve të Brendshme Horst Seehofer, tha së fundi se institucioni që ai drejton nuk do të marrë pjesë në studim.

Ministri Seehofer tha se në polici nuk ka diskriminim strukturor. Në rajonet e policisë ka zyra ankimi dhe se kur ka pasur denoncime për “raste individuale diskriminimi” ato janë sqaruar në mënyrë të pamëshirshme dhe sanksionuar menjëherë”. Po ashtu sipas ministrit “profilizimi racor” është i ndaluar në praktikën e policisë.

Kritika nga opozita dhe ekspertët

Politikanë të ndryshëm të opozitës e kritikuan vendimin e ministrit Seehofer duke e quajtur një shanc të humbur. Ekspertë të çështjeve të policisë, si p.sh. Rafael Behr u shprehën se një studim i tillë do të ishte i mirë “qoftë edhe për të treguar se policia bën përpjekje për sqarimin e dyshimeve për praktikën e “racial profiling”.

Drejtuese i Zyrës Federale të Antidiskriminimit, Bernhard Franke, tha se të dhënat për raste diskriminimi janë të ulëta dhe faktet e mbledhura përmes një studimi të tillë do të hidhnin dritë mbi praktikën e punës së organeve të rendit.

Paralajmërim i ekspertëve të BE-së

Propozimi për studimin mbi profilimin racor në Gjermani erdhi nga Komisioni Evropian kundër Racizmit dhe Intolerancës (ECRI). Në raportin e tij të fundit të botuar në mes të marsit, Këshilli i Evropës kishte denoncuar racizmin e përhapur dhe institucional në Gjermani. Ekspertët e ECRI-z kanë regjistruar sipas tij mjaft të dhëna që profilizimi racor është shumë i zakonshëm në radhët e policisë gjermane.

Në Gjermani policia ka ende një reputacion relativisht të mirë. Sipas Eurobarometrit të Komisionit Evropian të vjeshtës së vitin 2019, rreth 85 përqind e gjermanëve kanë besim tek policia, dhe vetëm rreth 12 përqind nuk i besojnë asaj.

Besimi është rritur paksa në krahasim me pranverën e vitit 2019, por megjithatë është më i ulët se në vitet 2017 dhe 2018. Eurobarometri publikohet dy herë në vit dhe përmban sondazhe të opinionit publik nga të gjitha vendet anëtare të BE-së për tema të ndryshme.

/portalb