Rusia paralajmëron për rrezik bërthamor nga konflikti Izrael-Iran: ‘Tejet i rrezikshëm..!?

Zëvendësministri i Jashtëm i Rusisë, Sergey Ryabkov, lëshoi një paralajmërim të hënën lidhur me situatën pranë centralit bërthamor të Bushehrit në Iran, për shkak të sulmeve ajrore të vazhdueshme nga Izraeli. Ai tha se situata është “tejet e rrezikshme”, duke shprehur shqetësim për mundësinë e dëmtimeve në objektet bërthamore iraniane.

Izraeli ka nisur operacionin “Luani në ngritje” që në orët e para të mëngjesit të së premtes, një përpjekje që zyrtarët izraelitë thonë se synon të parandalojë një sulm të planifikuar iranian dhe të pengojë aftësitë bërthamore të Teheranit. Si Izraeli, ashtu edhe SHBA kanë shprehur vazhdimisht shqetësim për mundësinë që Irani po punon për krijimin e armëve bërthamore.

Rusia, e cila është një aleate kyçe e Iranit, ka luajtur rol edhe në ndërtimin e centralit bërthamor të Bushehrit, i cili furnizohet me uranium rus, jo iranian. Ky central ndodhet në brigjet e Gjirit Persik.

Në deklaratën e tij për agjencinë TASS, Ryabkov tha: “Natyrisht, situata është tejet e rrezikshme. Deri tani, nuk ka pasur dëme serioze, sipas burimeve tona dhe informacionit të marrë nga Agjencia Ndërkombëtare për Energjinë Atomike (IAEA), por kjo është thjesht një rastësi fatlume. Rreziqet mbeten shumë të larta.”

Ai shtoi se përplasja ushtarake duhet të ndalet për të stabilizuar situatën, ndërsa theksoi se Rusia është duke analizuar të gjitha burimet e mundshme të informacionit mbi infrastrukturën bërthamore të Iranit.

Drejtori i përgjithshëm i IAEA-së, Rafael Mariano Grossi, konfirmoi se centrali i Bushehrit nuk është prekur nga sulmet deri më tani dhe se niveli i radioaktivitetit në impiantin e Natanz ka mbetur “i pandryshuar dhe në nivele normale”. Kjo do të thotë se nuk ka ndikim të jashtëm radioaktiv mbi popullatën apo mjedisin. Megjithatë, ai pranoi se ka pasur kontaminim të brendshëm brenda impiantit.

Grossi shtoi: “Është thelbësore që IAEA të marrë informacion teknik në kohë dhe në mënyrë të rregullt për këto impiante. Pa informacion të tillë, nuk mund të vlerësojmë me saktësi kushtet radiologjike dhe ndikimet e mundshme për popullatën dhe mjedisin.”

Ndërkohë, presidenti rus Vladimir Putin ka zhvilluar biseda telefonike me kryeministrin izraelit Benjamin Netanyahu dhe presidentin e ri iranian Masoud Pezeshkian, ku theksoi rëndësinë e rikthimit të negociatave dhe zgjidhjes së çështjeve rreth programit bërthamor të Iranit në mënyrë politike dhe diplomatike.

Konstantin Kosachev, nënkryetar i Dhomës së Lartë të Parlamentit rus dhe kryetar i Komisionit të Punëve të Jashtme, deklaroi javën e kaluar:
“Veprimet e Izraelit nuk mund të justifikohen nga asnjë pikëpamje, ligjore, politike, ushtarake apo morale. Shpresa e vetme, sado iluzore të jetë, për të shmangur një luftë të përgjithshme, është një dënim i përbashkët dhe i vendosur i kësaj operacioni nga komuniteti ndërkombëtar.”

Konflikti mes Izraelit dhe Iranit ka hyrë në një fazë alarmante, teksa të hënën Izraeli goditi transmetuesin shtetëror të Iranit, ndërsa mbrojtja civile izraelite lëshoi alarme për raketa të reja iraniane. Komuniteti ndërkombëtar mbetet në gatishmëri për të monitoruar zhvillimet në ditët dhe javët në vijim.

/syri.net