Rritja e çmimeve godet rëndë qytetarët ?

Jetesa po bëhet gjithnjë e më e shtrenjtë. Çmimet rriten, ndërsa pagat mbeten të njëjta. Enti Shtetëror i Statistikave ka matur rritje të shpenzimeve të jetesës në prill prej 5,7% krahasuar me të njëjtën periudhë të vitit të kaluar.

Rritje drastike të shpenzimeve janë regjistrua te ushqimi dhe pijet joalkoolike për 8,0%, pijet alkoolike dhe duhani për 10,2%, mobilimi, pajisjet për amvisëri dhe mirëmbajtja e rregullt e amvisërisë për 5%, shpenzimet për mbrojtjen shëndetësore janë rritur për gati 2%, ndërsa rritje më të theksuar të shpenzimeve qytetarët kanë edhe gjatë blerjes së perimeve për gati 7 për qind. Nga statistika kanë llogaritur gjithashtu se në nivel mujor ka rritje prej 1,3%.

„Ushqim dhe pije joalkoolike 8,0 %
Pije alkoolike, duhan dhe narkotikë 10,2%
Mobilim, pajisje për amvisëri dhe
mirëmbajtje e rregullt e amvisërisë 5,0%
Rekreacion, sport dhe kulturë 5,4%
Shërbime për arsim 4,6%
Restorante dhe shërbime akomodimi 4,3%
Kujdes personal, mbrojtje sociale dhe
mallra dhe shërbime të ndryshme 4,3%
Prodhime bujqësore 6,8%“ – Enti Shtetëror i Statistikave

Kryeministri Hristijan Mickoski pret që me uljen e çmimit të naftës dhe derivateve të naftës, të ketë edhe ulje të shpenzimeve të jetesës, por fillimisht do të presin muajin maj për të parë se si do të zhvillohen gjërat.

“Po e ndjekim këtë situatë, për momentin opsioni që TVSH-ja për produktet bazë ushqimore nga 5% të ulet, ende është në tavolinë, por sërish po ju them, rreth 0,7% ose 0,8% është ndryshimi mujor i çmimit të produkteve bazë ushqimore, në llogari të shërbimeve të transportit, përafërsisht kjo është ajo që është objekt i analizës sonë,“ tha Hristijan Mickoski, kryeministër.

Guvernatori i Bankës Popullore Trajko Slaveski, thotë se fillimisht do t’i analizojnë të dhënat e Entit Shtetëror të Statistikave, e më pas do të mendojnë për masa.
“Kur bëhet fjalë për ushqimin, ju e përmendët, ne do t’i analizojmë të dhënat, sepse ju folët në mënyrë agregate, Enti i Statistikave i paraqet sipas grupeve të produkteve, qoftë fruta, perime apo produkte të tjera ushqimore.

Mendoj se sipas asaj që kishim si të dhëna nga Ministria e Ekonomisë, nuk kemi pasur ndonjë goditje më të fortë, por mbetet, siç thamë, të shihet. Tani për tani, ju pyetët drejtpërdrejt, mendoj se kjo nuk ishte arsye që më 5 maj ne të marrim vendim për korrigjim lart të normës bazë të interesit të Bankës Popullore të RM-së” – Trajko Slaveski, guvernator i Bankës Popullore.

Reaguan edhe nga LSDM opozitare, të cilët thonë se me rritjen e inflacionit prej 5,7%, Hristijan Mickoski e ka sjellë popullin në prag të varfërisë. “Gjithçka është shtrenjtuar, ushqimi, faturat dhe jeta. Çmimet në markete po thyejnë rekorde. Shporta sindikale në prill ka arritur gati 69.000 denarë”, thonë nga LSDM duke shtuar se Qeveria po vonon edhe pagesat për ndihmë sociale dhe shëndetësi, sepse nuk ka para në buxhet.

/Alsat.mk