Rritet përsëri kostoja e Autostradës Kërçovë-Ohër për 803 milionë euro

Autostrada Kërçovë–Ohër, e njohur për vonesa dhe rritje të vazhdueshme të kostove, ka hyrë në një fazë të re shtrenjtimi. Është nënshkruar shtojca e tetë e kontratës, e cila shton edhe 186.28 milionë euro, duke e çuar vlerën totale të projektit në rreth 803 milionë euro.

Projekti, që filloi në vitin 2014 dhe duhej të përfundonte në 2018, është zgjatur disa herë për shkak të gabimeve në projektim, rrëshqitjeve të dheut dhe ndryshimeve politike. Sipas marrëveshjes së re, afati i ri për përfundimin e autostradës është 31 maji 2027, plus kohë shtesë për procedurat administrative.

Pas më shumë se një dekade ndërtimi, kjo autostradë po shihet gjithnjë e më shumë si një projekt me probleme serioze planifikimi dhe kosto të larta për shtetin.

/ms