Rrënjët në BDI lidhja e ngusht Grubi – Ahmeti !?
Kreu i BDI-së Ali Ahmeti, nuk e konteston vendimin e Departamentit Amerikan të Shtetit për të vendosur krahun e tij të djathtë Artan Grubi në Listën e Zezë. Thotë se Grubi ka të drejtë ankimimi. Ahmeti nuk ka në plan ta përjashtojë Grubin nga partia, tha se vendimi i takon vet atij.
I pyetur nëse qëndron prapa veprimeve të Grubit për të cilat akuzohet, Ahmeti nuk dha përgjigje konkrete duke theksuar se realizimi i programit partiak është detyrë e secilin anëtar.
“Unë mendoj që z.Grubi është i përgjegjshëm dhe i ndërgjegjshëm. Nuk ka nevojë ta largojë partia. Z.Grubi sigurisht se do të tërhiqet vet nga të gjitha funksionet e partisë.
A qëndroni prapa veprimeve të tij, meqenëse ai thoshte se ai bënë çfarë t’i thoni ju?
Tash…Z.Grubi ka qenë anëtar i BDI-së, ka qenë personalitet që ka drejtuar katër vite qeverinë e RMV-së. Sigurisht që vendimet që dalin nga platforma, nga programi elektoral i BDI-së, detyrim ka çdo anëtarë pavarësisht se në cilit funksion ndodhet. A në nivel të lartë a në nivele dytësore, ka përgjegjësi realizimin e platformës dhe të programit”, tha Ahmeti.
Artan Grubi që në nisje karrierës së tij politike në BDI, shkallët i kërcente me hapa të mëdhenj. U shndërrua në njeriun më të afërt të Ahmetit, i cili ia besoi pozitën e shefit të kabinetit që më pas të bëhet edhe sekretar organizativ i BDI-së. “Fuqizimi” i Grubit në BDI rriti pakënaqësitë, të cilat kulmuan me revoltën brenda për brenda partisë me formimin e të ashtuquajturit “Grupi i Zjarrit”. Por edhe përkundër ngritjes së zërit nga një pjesë e madhe e anëtarësisë kreu i BDI-së vendosi ta mbajë afër Artan Grubin dhe t’ia kthejë shpinën “Zjarrit”.
Jo vetëm kaq, por ai mori vulën e aktiviteteve partiake, fushatave dhe motove të partisë. Ahmeti e Grubi u bënë një, sa edhe zyrat e qeverisë nisën të kumbonin nga festat private, ditëlindjet si dhe lojërat sportive në to.
“Me bë me u idhnu me Evropën na pajton Amerika, me u idhnu me Amerikën nuk ka kush na pajton”, kishte thënë Grubi.
/ Alsat.mk
