Rinia e Kërçovës me vite e lënë pas dore !

Kërçova një qytet me histori të pasur dhe identitet të fortë shqiptar, rinia shqiptare vazhdon të jetojë në hije dhe e anashkaluar, e dëshpëruar dhe e zhgënjyer nga partitë politike që për dekada kanë manipuluar shpresat e saj. Në vend që të jenë motorri i ndryshimit, këto parti janë bërë pengesa kryesore për përfshirjen e të rinjve në jetën politike dhe shoqërore.

♦️Shumë të rinj shqiptarë në Kërçovë kanë ide të qarta, energji për të ndryshuar realitetin, dhe vullnet për të ndërtuar një të ardhme më të mirë. Por realiteti politik lokal është i mbyllur për ta. Partitë shqiptare që veprojnë në këtë rajon kanë kthyer politikën në një klub të ngushtë interesash personale dhe familjare, ku përfshirja e të rinjve nuk varet nga aftësia apo vizioni i tyre, por nga servilizmi, lidhjet farefisnore apo lojaliteti i verbër.

♦️Në vend që të investojnë në zhvillimin e rinisë, partitë politike në Kërçovë e shohin rininë vetëm si mjet propagandistik në kohë fushatash.Rinia përdoret si turmë në fushata, si “like” në rrjete sociale dhe si fotografi për imazh modern.

Pas zgjedhjeve rinia harrohet dhe vendimmarrja vazhdon të mbetet në duart e të njëjtave fytyra politike që prej dekadash nuk kanë lënë vend për mendim të ri, për ide të freskëta dhe për energji rinore. Asnjë forum rinor real, asnjë hapisrë politike për të rinjtë e pavarur. Vetëm manipulim dhe kontroll.

♦️Ironikisht, partitë politike nuk hezitojnë të flasin në emër të rinisë në çdo deklaratë publike. Por në realitet, ato i mbyllin dyert për çdo të ri që nuk është “i tyre”. Në këtë mënyrë rinia shqiptare në Kërçovë jo vetëm që përjashtohet, por edhe shtypet nga një sistem që ka frikë nga ndryshimi i vërtetë.

♦️E ardhmja e qytetit nuk mund të mbetet peng i gjeneratave që kanë dështuar ta ndërtojnë atë. Pa një rini aktive dhe të përfshirë në politikë, Kërçova do të mbetet në vendnumëro, ndërsa potenciali i saj më i madh TË RINJTË do të vazhdojën të ikin.

♦️Rinia kërçovare nuk ka nevojë për fjalë boshe, por për hapësirë të merituar. Nuk ka nevojë për dekor, por për drejtim. Nuk ka nevojë për përdorim, por për përfaqësim të denjë.
♦️Kërçova mburret me politikanët e djeshëm,por sot ka ardhur koha që politikanët e djeshëm tu japin hapsirë dhe shpresë RINISË SË SOTME.
Shkruan Rahman Rexhepi !

/ts