Rikthimi i trenit, një alternativë e re për qytetarët e Kërçovës , Gostivarit, Tetovës dhe Shkupit ?

Linja hekurudhore që lidh Shkupin me Tetovën, Gostivarin dhe Kërçovën vazhdon të jetë jofunksionale që nga 25 maji i vitit 2021, duke i lënë qytetarët plotësisht të varur nga transporti me autobus. Kohëve të fundit, shtrenjtimi i biletave për linjat ndërurbane drejt Shkupit ka nxitur reagime të shumta dhe pakënaqësi, sidomos te studentët dhe udhëtarët e rregullt.

Ndërkohë, autoritetet paralajmërojnë rikthimin e lidhjes hekurudhore pa përcaktuar data të sakta. Nga ndërmarrja e Hekurudhave të Maqedonisë, njësia Gostivar, bëjnë të ditur se linja Shkup–Kërçovë është pjesë e planeve më të gjera për zhvillimin e krahut perëndimor të Korridorit 8. Drejtori i kësaj njësie në Gostivar, Nadi Jonuzi, e cila numëron 13 të punësuar, njoftoi se aktualisht po punohet intensivisht në terren për përgatitjen e infrastrukturës.

“Aktualisht po punohet në rihapjen e sinjalistikës dhe riparimin e 180 pragjeve hekurudhore. Sa u përket objekteve të tjera infrastrukturore, të gjitha janë në funksion, sidomos ura e fshatit Sërmënovë, si një nga objektet më të rëndësishme të linjës Gostivar-Kërçovë. Planet tona janë që trenat të fillojnë të qarkullojnë nga marsi i vitit 2027”, deklaroi Jonuzi.

Nga ana tjetër për qytetarët, riaktivizimi i trenit do të thotë transport më i shpejtë dhe dukshëm më i lirë, veçanërisht në këtë periudhë kur çmimet e naftës dhe benzinës kanë arritur nivele tejet të larta. Qytetarët më tej shprehin domosdoshmërinë e rikthimit të kësaj linje. “Po, treni është dashur që shumë më herët të aktivizohet. Tash nuk e di, duhen edhe riparime shumë të mëdha për trenin dhe hekurudhën. Unë kam udhëtuar kur ishte ajo linja e rregullt. Kam udhëtuar me tren, nuk është problem ajo. Në vend të autobusit shkon edhe me tren. Të njëjtat shpenzime i ke, të njëjtat relacione i ke. Mirë është që të aktivizohet, sidomos tash edhe me këtë Korridorin 8 që është, duhet të favorizohet ajo”, thotë një qytetar.

Çmimet për udhëtime me tren janë tre deri katër herë më të lira, ndërsa nga ana tjetër do të shkarkohej edhe komunikacioni i stërngakuar në autostradën e tanishme. Rikthimi i kësaj linje do të ishte veçanërisht i rëndësishëm për banorët e komunave përgjatë aksit Shkup-Tetovë-Gostivar-Kërçovë, të cilët prej vitesh nuk kanë mundësi të përdorin transportin hekurudhor për udhëtimet e tyre të përditshme. Nga ministria e transportit thonë se sa i përket linjës hekurudhore Shkup-Tetovë, ajo është pjesë e planeve më të gjera për zhvillimin e lidhjes hekurudhore në krahun perëndimor të Korridorit 8.

“Aktualisht, së bashku me Bashkimin Evropian, po punohet intensivisht në dokumentacionin për lidhjen hekurudhore Shkup-Tetovë-Gostivar si fazë e parë, e cila më pas parashihet të vazhdojë drejt Kërçovës, Ohrit, Strugës dhe kufirit me Shqipërinë”, thonë nga kjo ministri.

/(koha.mk)