Reshjet e dendura shkaktojnë rrëshqitje në rrugën Kërçovë–Ohër !

Reshjet e dendura të shiut vazhduan edhe sot, dhe tashmë janë shkaktuar një sërë rrëshqitjesh dhe shembjesh të dheut nëpër rrugët e vendit.Problemet më të mëdha janë regjistruar në akset Dibër–Strugë dhe Kërçovë–Ohër afër Izvorit, ku balta dhe gurët kanë bllokuar plotësisht ose pjesërisht korsitë.

Sipas Qendrës Për Menaxhim me Kriza, drejtuesit e mjeteve kanë raportuar se kanë mbetur të bllokuar ose janë detyruar të kalojnë pranë grumbujve të baltës dhe shkëmbinjve, ndërsa ekipet e Rrugëve të Maqedonisë kanë qenë të angazhuara gjithë natën për pastrimin e terrenit.

Në rrugën rajonale Makedonski Brod – Shkup, pranë rezervatit “Jasen”, komunikacioni prej orës 08:40 të mëngjesit ishte ndërprerë plotësisht për shkak të një shembjeje që ka bllokuar korsinë. Nga Lidhja Auto – Moto, njoftuan se vazhdojnë aktivitetet për sigurimin dhe pastrimin e terrenit. Nga QMK si mbrëmë ashtu edhe sot kanë marrë disa thirrje në numrin e emergjencës për rrëshqitje dhe shembje të dheut në rrugë.

“Ekipet operacionale të QMK-së e ndjekin situatën në kohë reale dhe paralajmërojnë se, duke pasur parasysh ngopjen e tokës me ujë, çdo valë e re reshjesh të rrëmbyeshme mund të aktivizojë rrëshqitje shtesë në lokacionet tashmë të njohura si të rrezikshme”, thonw nga QMK.

Nga Qendra për Menaxhim me Kriza dhe Lidhja Auto-Moto u bëjnë apel qytetarëve të ndjekin paralajmërimet zyrtare, të mos nisen në udhëtim pa informacione të verifikuara për gjendjen e rrugëve dhe të ngasin me shpejtësi të ulët, sidomos në akset përmes grykave, përgjatë lumenjve dhe në vendet që edhe në të kaluarën janë njohur si zona me rrëshqitje.

Meteorologët paralajmërojnë se reshjet më intensive priten të premten dhe gjatë fundjavës, kur në disa pjesë të vendit mund të bien mbi 30 litra shi për metër katror brenda vetëm një dite.

/ Alsat.mk