Reagoi BDI-ja dhe ASH Sela-ja rreth takimit Mickoski-Filipçe..!?
Dy partitë opozitare shqiptare, Bashkimi Demokratik për Integrim (BDI) dhe Aleanca për Shqiptarët (ASH), kanë reaguar në lidhje me takimin e planifikuar ndërmjet kryeministrit Hristijan Mickoski dhe kryeopozitarit Venko Filipçe, transmeton Portalb.mk.
“Shprehim shqetësimin tonë të thellë për dominimin gjithnjë e më të theksuar mono-etnik që Qeveria ka demonstruar gjatë vitit të parë të qeverisjes së saj, ndërsa tani, tashmë në skenën publike, përfshin edhe opozitën etnike maqedonase në këtë prirje të saj”, reagojnë nga BDI-ja.
Ata takimin Mickoski – Filipçe e vlerësojnë si një “flirt i hapur”.
“Republikës së Maqedonisë së Veriut i nevojitet një dialog i mirëfilltë politik, por jo në takime intime mesnate, por në një format politik dinjitoz, me përfaqësim të qartë të të gjithë qytetarëve, ku të hapen çështjet themelore me rëndësi për vendin”, reaguan nga BDI-ja.
Aleanca për Shqiptarët (ASH) e udhëhequr nga Ziadin Sela, kanë vlerësur se LSDM-ja e udhëhequr nga Filipçe po sillet si degë e VMRO-DPMNE-së, duke e vlerësuar takimin “monoetnik për Maqedoninë përsëri e jona”.
“Kryetari i VMRO-DMPNE Hristijan Mickvski do të takohet me Kryetarin e degës më të madhe të VMRO-DPMNE-së Venko Filipçe! Pasi u zgjodh kryetar i LSDM-së takimin e parë e kishte me Kryetaren e shtetit znj.Siljanovska-Davkova!”, deklaruan nga ASH-ja, duke përkujtuar se Filipçe ishte etiketuar nga VMRO-ja si “ministër i vdekjes”.
Në lidhje me këtë takim të planifikuar ka reaguar edhe partia maqedonase ZNAM, e cila është në koalicion qeveritar me VMRO-DPMNE-në. Ata deklarojnë se Filipçe dhe LSDM-ja nuk kanë kredibilitet politik, as legjitimet të ofrojnë koncepte për Maqedoninë në këtë moment.
“Që këtej, Venko Filipçe dhe LSDM nuk mund të jenë zgjidhje e problemeve, sepse treguan se ata janë problem për çdo zgjidhje”, deklaruan nga ZNAM.
Ndryshe, kryeministri Hristian Mickoski dhe lideri i LSDM-së opozitare, Venko Filipçe nesër pritet të kenë takim prej orës 14:00.
Ky takim erdhi si propozim i Filipçes, pasi në një konferencë për media paraqiti konceptin për një dialog të ri shoqëror dhe politik.
/portalb
