REAGIM nga Shoqatat Kërçovare ne Zvicër

Shoqatat Kërçovare në Zvicër me reagim të fuqishëm ndaj tentativave për përjashtim gjuhësor dhe etnik
Në një takim të përbashkët të përfaqësuesve të shoqatave kërçovare që veprojnë në Zvicër, u vendos njëzëri që të ndërmerret një reagim publik lidhur me zhvillimet e fundit që prekin të drejtat e shqiptarëve si qytetarë të barabartë të Maqedonisë së Veriut.

Në deklaratën e lëshuar, shoqatat shprehin shqetësimin e thellë lidhur me veprimet e Këshillit Nacional Maqedonas, i cili, sipas tyre, i është bashkangjitur një fushate nxitëse nacionaliste të nxitur nga organizata “Gratë Maqedonase në Zvicër”. Sipas përfaqësuesve shqiptarë, peticioni i titulluar “Ambasada t’u rikthehet Maqedonasve” përbën një fyerje të rëndë për qytetarët jo-maqedonas të Maqedonisë së Veriut.
Shoqatat theksojnë se ambasadat dhe institucionet e shtetit u përkasin të gjithë qytetarëve të Maqedonisë së Veriut, pa dallim etnie.

Ata kritikojnë kërkesën për përdorim ekskluziv të gjuhës maqedonase dhe shkronjave cirilike, duke theksuar se kjo është në kundërshtim me Ligjin për Përdorimin e Gjuhëve dhe me realitetin shumëetnik të vendit.
“Është absurde të kërkosh komunikim vetëm në maqedonisht kur mbi 100 mijë qytetarë nga Maqedonia e Veriut jetojnë në Zvicër, shumica shqiptarë, dhe madje edhe maqedonas që nuk dinë ta përdorin gjuhën zyrtare në formën e saj standarde”, thuhet në reagim.

Shoqatat kërkojnë nga Këshilli Nacional Maqedonas në Zvicër të marrin shembull nga shteti zviceran, ku bashkëjetesa shumëgjuhëshe funksionon me sukses, dhe nga Ministria e Punëve të Jashtme e Maqedonisë së Veriut që të mos ndërmarrë vendime të njëanshme që cenojnë të drejtat e diasporës shqiptare.

Në fund, paralajmërohet edhe nisja e një peticioni kundërpërgjigjës në mbrojtje të të drejtave të shqiptarëve në diasporë, duke përfshirë edhe kërkesa konkrete ndaj ministrisë dhe deputetit të diasporës, i cili, sipas deklaratës, ka anashkaluar sistematikisht interesat e bashkëatdhetarëve shqiptarë.

Reagimi mbështetet nga shoqatat kërçovare në Zvicër:
1. Shoqata Kulturore Kërçova
2. Shoqata Kulturore Kollara
3. Shoqata Humanitare Cërvica
4. Shoqata Humanitare Tuhini
5. Shoqata Humanitare Greshnica
6. Shoqata Humanitare Leshnicë
7. Shoqata Humanitare Shitova
8. Shoqata Humanitare e Fshatit Qafë
9. Shoqata Zajazi
10. Shoqata Baçishtë
11. Shoqata Drogomisht i Vogël
12. Fondi Besa Drogomisht i Madh
13. Shoqata Humanitare Zhubrina
14. Fondi Humanitar Llapkin-Doll
15. Shoqata Kastriot Sërbicë
16. Shoqata fsh. Kolibarë
17. Shoqata e Bashkuar Prapadishti
Kërçovarët në diasporë shprehin unitet të fuqishëm në mbrojtje të barazisë dhe të drejtave të tyre në shtetin e përbashkët.

/tvgurra