Reagim nga Shoqata Humanitare Cërvica – Zvicër

Statuti i Shoqatës Humanitare Cërvica
Neni 1
Me këtë emër Shoqata Humanitare Cërvica e themeluar më 27.06.1999 në Root (LU), udhëhiqet shoqata e pavarur, jopartiake, dhe joqeveritare e qytetarëve që jetojnë në territorin e Konfederatës Zvicerane e që janë me origjinë nga Cërvica e R. së Maqedonisë.

Me shqetësim të thellë kemi ndjekur gjuhën fyese, të turpshme dhe krejtësisht të papranueshme që është përdorur nga një i punësuar në Komunën e Kërçovës, kundrejt fshatit tonë Cërvicë dhe Shoqatës Humanitare Cërvica.
Deklaratat publike, ku përdoren shprehje të rënda, fyese dhe kërcënuese ndaj fshatit dhe përfaqësuesve të shoqatës, janë jo vetëm të pahijshme, por përbëjnë një akt të pastër fyes dhe të dënueshëm nga çdo këndvështrim etik, moral dhe njerëzor.

Dëshirojmë të theksojmë se:
• Shoqata Humanitare Cërvica, për vite me radhë, ka kontribuar në mënyrë aktive dhe të vazhdueshme në ndihmë të gjithë kërcovarëve dhe ka qenë gjithmonë në mbështetje të Komunës së Kërçovës dhe kryetarit të saj;

• Çdo aktivitet i yni është zhvilluar me transparencë, me pjesëmarrje të gjerë dhe gjithmonë me ftesë të posaçme për kryetarin Fatmir Dehari – si dhe përfaqësues të tjerë nga Kërçova.
Andaj, ne i konsiderojmë të papranueshme dhe të dënueshme publikisht deklaratat e individit që përdori gjuhë të tillë të ulët ndaj fshatit dhe shoqatës që punon për të mirën e përgjithshme.

Kërkojmë:
• Falje publike nga ana e personit përgjegjës;
• Distancim të qartë nga ana e udhëheqësisë, institucioneve komunale nga kjo sjellje fyese;
• Dhe u bëjmë thirrje të gjithë qytetarëve të Kërçovës që të mos bien pre e gjuhës së urrejtjes dhe provokimeve që cenojnë bashkëjetesën dhe respektin mes nesh.

Cërvica është dinjitet, dhe nuk do të lejojmë që të përbaltet nga askush.
Kryesia e Shoqatës Humanitare “Cërvica”
Zvicër
16.10.2025

/ms