Qendrim Rijani: Depërtimi në botën e artit kërkon durim dhe këmbëngulje, mos lejoni që sfidat t’ju ndalin

Eksperiencat e para në teatër më ndihmuan të kuptoj se arti është një mënyrë për të sfiduar dhe reflektuar mbi realitetin, kështu tha për Portalb.mk regjisori Qendrim Rijani. Ai gjithashtu shtoi se eksperimentimi, kërkimi i vazhdueshëm dhe përballja me sfidat kanë qenë pjesë e pandashme e rrugëtimit të tij drejt këtij profesioni. Rijani edhe më tej foli për rrugëtimin e tij drejt artit, planet dhe projektet në vazhdim.

Portalb.mk: Qendrim, ke treguar suksesin tënd gjithandej ku je shfaqur. Na trego rrugëtimin tënd drejt këtij suksesi?
Qendrim Rijani: Suksesi nuk është diçka që vjen brenda natës. Është një rrugëtim i gjatë, i mbushur me përkushtim, punë të palodhur dhe mbi të gjitha, dashuri për artin, dhe bashkudhëtarët. Që në hapat e mi të parë në teatër, e kam ndjerë fuqinë e skenës dhe e kam ditur se kjo është rruga ime. Eksperimentimi, kërkimi i vazhdueshëm dhe përballja me sfidat kanë qenë pjesë e pandashme e këtij rrugëtimi.

Portalb.mk: Si nisi rrugëtimi juaj drejt teatrit dhe aktrimit në aspektin e formimit edukativ?
Qendrim Rijani: Dashuria për teatrin filloi shumë herët, por rrugëtimi profesional u konkretizua me studimet në këtë fushë. Gjatë shkollimit, përveç formimit teorik dhe praktik, pata fatin të punoj me pedagogë të mrekullueshëm dhe të njoh mjeshtra të mëdhenj të skenës. Eksperiencat e para në teatër më ndihmuan të kuptoj se arti është një mënyrë për të sfiduar dhe reflektuar mbi realitetin.

Portalb.mk: Sa është e vështirë të depërtosh në botën e artit dhe sa kanë përkrahje institucionale dhe shoqërore?
Qendrim Rijani: Depërtimi në botën e artit kërkon durim dhe këmbëngulje. Fatkeqësisht, mbështetja institucionale shpesh nuk është aq sa është e nevojshme, ndërsa përkrahja shoqërore varet nga vetëdija kulturore e vendit në të cilin punoj çdo shfaqje. Megjithatë, arti gjithmonë gjen mënyra për të ekzistuar, sepse është nevojë e përhershme e shoqërisë. Sfida kryesore është të gjendesh në hapësira teatrore ku mund të shprehesh lirisht dhe të krijosh diçka me vlerë dhe të arrish të thuash atë që nuk e thotë dot çdokush.

Portalb.mk: Me çfarë sfidash ballafaqohet një regjisor kur është në pyetje vënia në skenë e ndonjë vepre?
Qendrim Rijani: Sfidat janë të shumta, që nga koncepti regjisorial, gjetja e aktorëve të duhur, deri te aspektet teknike. Çdo vepër ka natyrën dhe kërkesat e saj specifike. Për mua, sfida më e madhe është t’i bëj një interpretim autentik një vepre, pa humbur thelbin e saj, por njëkohësisht ta bëj të veçantë e të kapshme për publikun.

Portalb.mk: Cila është pjesa juaj e preferuar e regjisë?
Qendrim Rijani: Pjesa më e bukur për mua është procesi i krijimit – momenti kur gjithçka është ende e paformuar dhe ke mundësinë të eksperimentosh. Më pëlqen puna me aktorët, të ndërtojmë botën e personazheve dhe të krijoj një gjuhë vizuale që komunikon me audiencën. Më frymëzon procesi i transformimit të një teksti të shkruar në një përvojë të gjallë skenike.

Portalb.mk: Opera “Skënderbeu” është një ndër veprat më të rëndësishme nga ju si regjisor. Publiku për këtë vepër ka duartrokitur për plot nëntë minuta. Si arritët që të bëni për vete publikun?
Qendrim Rijani: Në këtë vepër, u përpoqa të sjell një interpretim sa klasik, aq edhe modern, duke ruajtur madhështinë e figurës së Skënderbeut, por njëkohësisht duke e bërë atë të afërt me publikun dhe kohën. Një nga çelësat ishte bashkëpunimi i shkëlqyer me ekipin artistik, ne të cilët arritëm të krijojmë një vepër historike por nga ana tjetër edhe ta shënojmë si një akt historik Operën e parë Shqiptare në RMV.

Portalb.mk: Për çfarë po punoni aktualisht dhe çka presim në vazhdim nga ju?
Qendrim Rijani: Aktualisht jam i angazhuar në disa projekte teatrale , disa prej të cilave janë bashkëpunime ndërkombëtare. Po përgatitem për një tjetër vepër klasike, e cila do të sjellë një qasje të re në interpretimin e saj.

Portalb.mk: Keni paraparë bashkëpunime me vendet rajonale?
Qendrim Rijani: Po, besoj shumë në fuqinë e bashkëpunimeve ndërkombëtare. Disa nga shfaqjet e mia këtë vit do të jenë pjese e disa festivaleve rajonale. Teatri është universalisht i lidhur dhe shkëmbimi i eksperiencave me teatro dhe artistë nga rajoni apo më gjerë është shumë i frytshëm. Kam pasur disa projekte të suksesshme me teatro nga vendet fqinje dhe synoj të vazhdoj me këtë rrugë.

Portalb.mk: Sigurisht, të gjithë dëshirojnë një mesazh nga ju si personalitet tepër i suksesshëm. Cili do ishte mesazhi juaj për lexuesit tanë?
Qendrim Rijani: Besoni në art, në vlerat e tij dhe në fuqinë që ka për të ndryshuar mendimin e masës. Mos kini frikë të ndiqni ëndrrat, por gjithmonë punoni për to me përkushtim dhe integritet. Dhe mbi të gjitha, mos lejoni që sfidat t’ju ndalin, arti ashtu si dhe jeta kërkojnë guxim!

/portalb