Pse ne Maqedoni festa bëhet shkas për gjuhë të urrejtjes, e jo respekt ndërkulturor !?

Më 28 Nëntor, festa e Pavarësisë së Shqipërisë u shënua edhe në disa qytete të Maqedonisë së Veriut, ku rrugët u mbushën me flamuj kuq e zi. Megjithatë, si çdo vit, mediat dhe hapësira publike u dominuan nga narrativa negative dhe gjuhë urrejtjeje ndëretnike.

Gazetari Borjan Jovanovski thekson se kjo gjuhë është tregues i nivelit të ulët të kulturës politike, ndërsa shpesh edhe vetë zyrtarët publikë nxisin urrejtje me deklaratat e tyre. Shembull është rasti i një polici në Strugë që ofendoi flamujt shqiptarë.

Mediat maqedonase u fokusuan vetëm te incidentet, duke anashkaluar thelbin e festës, gjë që, sipas aktivistëve, përforcon paragjykimet. Umejr Muhamedi kritikon raportimin tendencioz, ndërsa juristja Mersiha Smailovic kujton se korniza ligjore për ndëshkimin e gjuhës së urrejtjes ekziston, por nuk zbatohet në mënyrë të paanshme, sidomos ndaj personave me ndikim.

Aktivisti Dehran Asanov shton se mosreagimi i institucioneve e bën gjuhën e urrejtjes “normale”, sepse tolerimi nga nivelet e larta politike e përhap atë në gjithë shoqërinë.

Pavarësisht historisë dhe sfidave të multikulturalizmit, kërkohet që politikanët dhe institucionet të promovojnë tolerancën, respektin dhe njohjen reciproke, në mënyrë që gjuha e urrejtjes të mos jetë reagimi i parë ndaj dallimeve kulturore.

/portalb