Pse nafta është bërë shumë më e shtrenjtë se benzina ?

Dizeli është thelbësor për industrinë, transportin dhe bujqësinë, sepse përdoret nga kamionët, anijet dhe makineritë e rënda që mbajnë në lëvizje logjistikën dhe prodhimin.

Evropa ka prej vitesh mungesë strukturore të dizelit. Pas sanksioneve ndaj Rusisë, furnizimi duhet të vijë nga tregje më të largëta si Lindja e Mesme dhe India, gjë që rrit kostot. Tensionet në Lindjen e Mesme dhe rreziku për transportin në Ngushticën e Hormuzit e rrisin edhe më shumë çmimin.

Për këtë arsye, çmimi i dizelit po rritet më shpejt se benzina. Shtetet zakonisht ndjekin çmimet ndërkombëtare kur vendosin çmimet maksimale të karburanteve.

Rritja e çmimit të dizelit ka ndikim të madh në inflacion, sepse ai përdoret në transportin e ushqimit, materialeve të ndërtimit dhe pothuajse të gjitha mallrave. Kur dizeli bëhet më i shtrenjtë, rriten kostot e transportit, bujqësisë dhe ndërtimit, dhe këto kosto kalojnë te çmimet e produkteve.

Për këtë arsye ekonomistët shpesh thonë: benzina është karburant për makinat, ndërsa dizeli është karburanti i ekonomisë.

/alsatm