Pse kështu zt.Pllana ?

Kur dinjiteti i komunitetit tonë nëpërkëmbet nga ata që dikur kanë gjetur mbështetje dhe mirëkuptim në institucionet tona, kjo nuk është thjesht mosmirënjohje — është perfidia, shkelja më e rëndë e besës dhe e mirësisë së dhënë.

Para katër vitesh, z. Pllana u prit me nder dhe respekt në Xhaminë e Bardhë në Aarburg në shënimin e 14 vjetorit të Pavarësisë së Kosovës, ku foli me një gjuhë krejt tjetër. Sot, ai zgjedh të flasë me përçmim ndaj komunitetit dhe xhamive tona. Ky ndryshim i papritur ka lënë komunitetin tonë të tronditur, të lënduar dhe të zhgënjyer.

Është veçanërisht e dhimbshme kur një njeri që dikur shihej si personalitet me kredibilitet dhe maturi, sot shfaqet me gjuhë nënçmuese ndaj atyre që e kanë nderuar. Kjo rrëshqitje nga serioziteti në përçmim nuk është shenjë force, por lëkundje e parimeve. Një personalitet i vërtetë nuk e ndërton veten duke fyer rrënjët e veta dhe dinjitetin e atyre që e kanë respektuar.

Zt.Pllana,
Xhamitë tona janë institucione të ligjshme dhe të respektuara. Ato kontribuojnë në edukim, integrim dhe stabilitet shoqëror. Çdo përpjekje për t’i paraqitur si problem është e pabazë dhe e dëmshme për harmoninë e Zvicrës.
Sa i përket botimit të veprave dhe promovimit të dokumentarëve tuaj, gishtin duhet ta drejtoni tek Ministria e Arsimit dhe Kulturës, tek institucionet kulturore dhe akademike — jo tek xhamitë.

Xhamitë nuk janë zyrë kulture, as shtëpi botuese, as platformë promovimi. Ato janë institucione fetare që mbajnë mbi supe përgjegjësi shpirtërore dhe shoqërore, jo detyra që u takojnë ministrive dhe agjencive shtetërore. Ndonëse xhamitë shqiptare në Zvicër kanë botuar vepra të ndryshme, madje më shumë se ata që ditë e natë thirren në patriotizëm.

Së dyti, duhet ta kuptoni një realitet të thjeshtë: kur populli shqiptar në Zvicër dhuron një milion franga brenda një nate për një qendër kulturore shqiptare islame, kjo tregon qartë se kujt i beson. Ata i besojnë projekteve serioze të imamëve dhe kryesive të xhamive, të cilët janë rritur, edukuar dhe shkolluar këtu, në Zvicër. Ata u besojnë njerëzve që punojnë çdo ditë me komunitetin, jo parrullave të atyre që deri dje vajtonin për « Boro e Ramizin » Populli e di shumë mirë se ku ka vlerë, ku ka transparencë dhe ku ka punë të ndershme, prandaj i mbështet këto projekte.

Në një shoqëri dhe shtet normal, diskursi që nxit përçarje nuk i shërben askujt dhe është i dënueshëm. Imamët shqiptarë në Zvicër do të vazhdojnë të punojnë me dinjitet, transparencë dhe përkushtim për komunitetin tonë dhe për shoqërinë zvicerane.
Patritotët e vërtetë dhe të mençur e mbyllin këtë debat me një kërkim falje publike. Shkruan Nehat Ismaili nga Xhamia e bardhë Aarburg

/ms