Pse infeksionet me Covid-19 po rriten përsëri në Zvicër..?

Në një konferencë për shtyp këtë javë, Ministri i Shëndetësisë, Alain Berset tha se “në nëntor, situata ishte më pozitive dhe shpresëdhënëse, duke na bërë të besojmë se mund të ulim numrin e rasteve ditore në mes 600 dhe 800 deri në Krishtlindje”.

Sidoqoftë, kjo nuk ka ndodhur dhe numri i infeksioneve të raportuara ditore ka lëvizur midis 4,000 dhe 5,000 në disa ditët e fundit, përcjell albinfo.ch.

Kjo rritje mund të çojë në masa të mëtejshme, më të rrepta kombëtare.

Ekspertët zviceranë thonë se kjo rritje e numrave është për shkak të një kombinimi faktorësh, përfshirë mënyrën në të cilën kriza shëndetësore është menaxhuar nga autoritetet.

Masa të ndryshme kantonale

Ndërsa kantonet e Zvicrës frëngjishtfolëse kishin zbatuar një mori kufizimesh për të frenuar infektimet – përfshirë mbylljen e restoranteve, bareve, si dhe ambienteve argëtuese dhe sportive – jeta e përditshme në pjesën zvicerane-gjermane vazhdoi në pjesën më të madhe sikur nuk kishte pandemi.

“Kantonet që flasin gjermanisht bënë një gabim duke mos u përgjigjur me shpejtësi dhe vendosmëri kur numrat filluan të rriteshin përsëri”, tha Alexander Trechsel, Profesor i Shkencave Politike në Universitetin e Lucernit, në një intervistë.

“Nëse politikanët kantonalë do të kishin reaguar shpejt në atë kohë, nuk do të na duheshin masa kaq drastike tani”, vuri në dukje ai, përcjell tutje albinfo.ch.

Christoph Zenger, drejtor i Qendrës për Ligjin Shëndetësor dhe Menaxhimin e Kujdesit Shëndetësor në Universitetin e Bernit, theksoi në të njëjtën intervistë se “nëse kantone individuale merren shumë lirshëm me pandeminë, ato rrezikojnë të gjithë Zvicrën”.

Këshilli Federal dështoi në udhëheqje

“Një menaxhim më i centralizuar do të ishte i nevojshëm, në vend të kaosit të masave” të miratuara nga kantone, tha Trechsel.

Ai gjithashtu vuri në dukje se procesi i vendimmarrjes në nivelin federal nuk ka qenë pa të meta gjatë pandemisë.

Parimi i kolegjialitetit për të cilin është i njohur Këshilli Federal me shtatë anëtarë “ishte nën një tension të madh në këtë krizë”, tha Trechsel.

Dallimet e mendimeve brenda qeverisë kontribuan në faktin se “Këshilli Federal kryesisht veproi në mënyrë reaktive sesa në mënyrë aktive”, shtoi ai.

“Tani masat e qëndrueshme në nivelin federal janë të nevojshme përsëri. Ndoshta është koha të kthehemi në gjendjen e jashtëzakonshme”.

Parlamenti nuk ka mbështetur kufizimet federale

Trechsler vuri në dukje se shumë deputetë nuk mbështetën, por përkundrazi kundërshtuan masat e mandatuara nga qeveria.

“Sigurisht, parlamentarët kanë të drejtë të shprehin mendimin e tyre dhe të diskutojnë rregullat, por ata gjithashtu duhet të mbështesin masat e nevojshme”, tha ai.

Zenger tha se mosmarrëveshjet midis ekspertëve janë gjithashtu pjesërisht fajtore për situatën aktuale.

“Mendimet kontradiktore të specialistëve të ndryshëm janë konfuze për publikun”, tha ai.

“Do të ishte e dobishme që diskutimet të kryheshin së pari ndërmjet tyre dhe jo në forume publike”.

Grumbuj infeksionesh

Didier Pitter, kreu i njësisë së kontrollit të infeksionit në Spitalet e Universitetit të Gjenevës (HUG) i tha transmetuesit publik RTS se shumica e rasteve ndodhin brenda familjeve ose midis miqve – kjo do të thotë, në grupe të ngushtë njerëzish.

“Njerëzit mund të respektojnë të gjitha masat e mbrojtjes kur janë jashtë shtëpisë, por pasi të jenë me anëtarët e familjes ose miqtë, ata heqin mbrojtjen e tyre”.

/albinfo