Protestat në Rusi, mbi 1300 të arrestuar..

Mbi 1300 persona se janë arrestuar gjatë protestave në Rusi, pas vendimit të Putinit për mobizilim të pjesshëm ushtarak për të luftuar në Ukrainë.

Policia ruse nuk kurseu as gratë e as të rinjtë, të cilët tërhiqeshin zvarrë rrugëve. Një pjesë e të arrestuarve u dërguan direkt si regrutë në ushtri.

Protestuesit u mblodhën në 37 qytete. Ata theksuan se është dashur shumë më herët të mbushin rrugët për t’i thënë JO luftës dhe ndal Putinit.

“Duhet të kishim frikë më herët. Më e keqja veçmë ndodhi”.
“Nuk jam e frikësuar. Nuk jam e frikësuar për asgjë. Gjëja më e vlefshme që mund të na marrin është jeta e fëmijëve tanë. Unë nuk ua jap atyre jetën e fëmijës tim. Është detyra ime të shprehë qëndrimin tim. Jo luftës”.

Nga ana tjetër shumë rusë kanë rezervuar bileta njëdrejtimëshe për t’u larguar nga Rusia. Çmimet e biletave janë rritur menjëherë.

Për eksodin masiv rus tregohet edhe në FlightRadar, një faqe interneti e njohur që merret me gjurmimin e fluturimeve. Ata publikuan një video të shkurtër që tregon trafikun ajror nga Moska dhe Shën Petersburgu. Në video shihet se trafiku është shtuar dhe shumica e fluturimeve kanë përfunduar në Turqi.

Biletat për fluturimet prej Moskës drejt Stambollit dhe Dubait janë shitur në deri 9.200 euro. Një grup me bazë në Beograd, i quajtur, Rusët, bjellorusët, ukrainasit dhe serbët të bashkuar kundër luftës, ka bërë të ditur se nuk ka më bileta për fluturimet nga Rusia në Beograd deri në mesin e muajit tetor. Rusët mund të hyjnë në Serbi pa viza.

Beogradi nuk u është bashkuar sanksioneve të Perëndimit kundër Rusisë për luftën e nisur në Ukrainë. Vendet aleate sikurse Bjellorusia dhe Kina, nuk kanë vënë po ashtu sanksione ndaj Rusisë.

/Alsat.mk