Prokuroria heton në tri pista incidentin e helmimit të banorëve të Gostivarit me ujë të pijshëm !

Prokuroria e Gostivarit po shqyrton mundësinë e zgjerimit të hetimit për helmimin e qytetarëve nga ndotja e ujit të pijshëm. Nga Prokuroria konfirmojnë për Alsat se po hetohen tri pista, duke filluar nga incidenti i ndotjes, projekti për përmirësimin e ujësjellësit “SECO 2” i cili është zvarritur me vit

“Hetimi vijon dhe intensivisht po mblidhen prova në bazë të urdhrave të lëshuar nga Prokuroria Themelore Publike Gostivar. Prokuroria heton, si në lidhje me ngjarjen e ndotjes së ujit për pije, ashtu edhe në lidhje me projektin për përmirësimin e furnizimit me ujë, por edhe në lidhje me veprimin e denoncimeve paraprake për ndotjen e ujit për pije në Gostivar. Pas shqyrtimit të të gjitha aspekteve do të sillet vendim prokurorial, ndërsa opinioni do të njoftohet”, theksoi Prokuroria Themelore Publike Gostivar.

Ndërsa Prokuroria po shqyrton përgjegjësinë penale, kryetari i Gostivarit, Valbon Limani, në intervistën e fundit për Alsat tha se deri tani nuk është ftuar për të dëshmuar për incidentin. Për përgjegjësinë morale, Limani tha se ndjen revoltë dhe hidhërim, por e cilësoi si fat që incidenti nuk përfundoi me pasoja vdekjeprurëse.

“Po ku çaloi sistemi? Ndjeni hidhërim, po ju keni përgjegjësi dhe kompetent? Të gjithë ne jemi njerëz dhe mund të ketë ndodh një gabim i cili rezultoi me gjithë atë që ndodhi”.
“Ishte një fatkeqësi ajo që ndodhi dhe për fat të mirë, nga e gjithë kjo fatkeqësi, nuk kishte asnjë pacient i cili ndërroi jetë, apo asnjë pacient që ka ende probleme shëndetësore nga kjo situatë dhe e mira e gjithë kësaj u tejkalua pa asnjë jetë njerëzore”, tha më 22 shtator Valbon Limani, Kryetar i Gostivarit.

Hetimi për helmimin e qytetarëve të Gostivarit u hap më 20 korrik, pas rritjes së madhe të numrit të rasteve me simptoma helmimi, që dyshohej se lidhej me konsumimin e ujit të pijshëm. Tre të dyshuarit, të cilët së fundmi u liruan nga paraburgimi, sipas Prokurorisë dyshohen se kanë vendosur tri pompa uji me qëllim rritjen e presionit në rrjetin e ujësjellësit. Gjatë kontrollit, sipas Prokurorisë, është konstatuar se dy prej pompave kanë injektuar ujë të ndotur me fekale drejtpërdrejt në ujësjellës, i cili më pas është konsumuar nga banorët. Për këtë, të dyshuarit ngarkohen për vepra të rënda kundër mjedisit jetësor dhe natyrës, të kryera në bashkëpunim, për të cilat parashihet dënim me burgim prej së paku katër vjetësh.

/Alsat.mk