Politika bastarde dhe qentë endacakë..! Shkruan Dr.prof Arbër Çeliku

Që dy dekada kam ngritur alarmin për pasojat e kësaj politike bastarde, megjithatë reflektimi ka qenë i pakët. Perceptimi publik ka qenë shpërfillës, madje një pjesë e publikut e ka glorifikuar atë për interesa meskine.

Dhe ja, dita-ditës, faturën e gjithë kësaj po e paguajmë vetë. Dyndje masovike, shkatërrim deri në rrënjë të arsimit, shëndetësisë, sistemit juridik dhe përvetësim të pronës publike nga profetët e rrejshëm.

Ende vazhdojnë me frazat boshe, se do të na çojnë në Evropë, por shtrohet pyetja: Si mund të të çojë në Evropë kjo politikë bastarde, kur për këto dekada demokraci nuk mundën të rregullojnë problemin e bërllogut dhe qenve endacakë, që kanë stërmbushur rrugët dhe lagjet tona?!
Çuditem se si ende ka njerëz që mund ta besojnë këtë!

Kafshimi i fëmijës nuk është rasti i parë në Kërçovë dhe as që do të jetë i fundit. Ka individë, të kafshuar nga turma e qenve endacakë, që kanë mbetur invalidë, të traumatizuar dhe me pasoja të rënda shëndetësore.

Teksa ne heshtim, sepse jetojmë me moton “mirë që nuk më ka ndodhur mua, mirë që nuk qe fëmija im”, “majori” i komunës, në vend që të struktet nga turpi (meqë askush nuk kërkon përgjegjësi nga ai, se ndryshe do t’i kishte pasur sot punët), del e fotografohet me fëmijën e dëmtuar rëndë, sikur mirënjohje të kërkojë. Dhe, ka të ngjarë, që me këtë mentalitet të publikut, edhe mirënjohje t’i ndahet për këtë…

/ms