Pikëpyetje të shumta se kush do të jenë “viktimat” e Grubit?

Kthimi i Artan Grubit ka shkaktuar “tërmet” të vërtetë në skenën politike në Maqedoninë e Veriut. Pozita e tij si ish-zëvendës kryeministër i parë, dhe kyçja e tij në shumë procese ka bërë që të dy kampet politike të akuzojnë njëra tjetrën se kush ka bashkëpunuar më shumë me Grubin. VLEN ka filluar të akuzojë BDI-në se është e frikësuar dhe e trishtuar për kthimin e Grubit, ndërsa VMRO DPMNE-ja akuzon LSDM-në se është e frikësuar dhe se kur kanë qenë bashkë në pushtet kanë heshtur për “krimet milionëshe të Grubit”. Por, çfarë në të vërtetë do të ndodhë me kthimin e Grubit, do të shihet gjatë ditëve në vijim, kur prokuroria do të dalë me akuza të reja për funksionarë që kanë ndarë “milionat” me Grubin”, shkruan “Zhurnal.mk”.

Koalicioni VLEN, i cili është pjesë e shumicës qeverisëse kanë njoftuar se po fillon një përballje e brendshme në Bashkimin Demokratik për Integrim, në të cilën nga njëra anë janë kryetari i partisë, Ali Ahmeti, me një grup ish-zyrtarësh dhe nga ana tjetër është Artan Grubi, të cilin e akuzojnë se i ka kryer të gjitha marrëveshjet politike dhe korruptive të integristëve.

VLEN konsideron se Artan Grubi nuk është një ish-zyrtar ‘i zakonshëm’, por njeriu që i di të gjitha hollësitë e sistemit që BDI ka ndërtuar me vite. Ai është arkivi i gjallë dhe lëvizës i një skeme partiake që është fshehur nga publiku me vite dhe se sapo “kutia e zezë” bie në duart e institucioneve, nuk ka më vend për aktrim. Prandaj, në atë kuptim, ata deklarojnë se ka panik në BDI sepse, institucionet po fillojnë të “gërmojnë” për të vërtetën që BDI e ka varrosur me vite.

Narrativa e kryeministrit, liderit të VMRO-DPMNE-së është e ngjashme, me ndryshimin se, sipas tyre, Lidhja Socialdemokrate e Maqedonisë (LSDM) ka frikë nga ajo që mund të thotë Grubi. Nga VMRO DPMNE thonë se Venko Filipce dhe LSDM janë të vetmit që kanë frikë për shkak të korrupsionit dhe krimit të strukturave afër partisë, duke kërkuar që drejtësia duhet të vihet në vend dhe institucionet e sistemit duhet të funksionojnë.

Ky qëndrim i tyre është një reagim ndaj pretendimeve të bëra nga kreu i LSDM-së, Venko Filipçe, i cili tha se kthimi i Grubit ishte një marrëveshje politike midis VMRO-DPMNE-së dhe BDI-së, dhe mënyra se si u krye shkatërroi sistemin ligjor në vend, shkruan “Zhurnal.mk”.
Megjithatë, BDI në një deklaratë me shkrim i bërë thirrje gjykatës, prokurorisë dhe të gjitha autoriteteve kompetente që të mos i nënshtrohen presionit politik dhe të veprojnë vetëm në bazë të ligjit dhe provave.

Përndryshe, reagime në publik ka edhe midis palëve që pasuan pasi Prokuroria propozoi dhe Gjykata miratoi arrestin shtëpiak për Artan Grubin, i cili u shfaq pas më shumë se një viti në arrati.
E gjitha kjo tollovi në opinion dhe brenda partive politike është krijuar për shkak të dilemave dhe pikëpyetjeve të shumta se kush do të jenë “viktimat” që Artan Grubi do t’i japë në prokurori. Cilat janë emrat që do të akuzohen në të ardhmen nga prokuroria si rezultat i dëshmisë së Grubit dhe kush janë personat që kanë bashkëpunuar me atë.

Nga VLEN i fërkojnë duart se do të shkojë “koka” e Ahmetit” dhe funksionarëve të lartë të BDI-së, ndërsa nga VMRO DPMNE i fërkojnë duart se do të shkojë “koka” e Filipçes, apo Kovaçevskit dhe funskionarëve të lartë të LSDM-së.

Me këtë formë, nga partitë në pushtet presin që të eliminojnë kundërshtarët e tyre politik dhe pikërisht në këtë formë e ndërtojnë narrativin e tyre politik.
Si do që të jetë, shumë shpejt do t’i dale koka kësaj pune dhe do të mësohen se kush janë “kurbanët” që do të largohen nga skena politike në Maqedoninë e Veriut!, shkruan “Zhurnal.mk”.

/zhurnal