Pesë kompani në garë për ta veshur policinë e Maqedonisë !

Në shtator, ministri i Punëve të Brendshme, Pançe Toshkovski, njoftoi se policia do të pajiset me uniforma të reja për mbi 7.000 punonjës. Ministria shpalli tenderin më 22 shtator, ndërsa ofertat u hapën më 19 nëntor. Prokurimi ndahet në katër kategori: xhaketa dimërore, uniforma terreni, këpucë dhe çizme. Pesë kompani aplikuan, por vetëm dy – “Neni Kompani” dhe “Megasport” – ofruan oferta për të gjitha kategoritë.

Disa nga kompanitë kanë përvojë të mëparshme me MPB-në, ndërsa të tjera janë të reja në treg. Vlera e pritshme e tenderit arrin rreth 8 milionë euro. Ky proces u bë edhe më i diskutueshëm pas dyshimeve të mëparshme për tenderët e uniformave për njësitë speciale, ku fituan kompani pa përvojë të dukshme, përfshirë “Pamitex” dhe “Le Brand Design”, të cilat tashmë kanë marrë porosi mbi 1.6 milionë euro gjithsej.

MPB thotë se vepron sipas ligjit dhe se uniformat janë në prodhim, por ende nuk jep detaje për etiketat dhe origjinën e tyre. Tashmë pritet vendimi final se cila kompani do të furnizojë uniformat e rregullta të policisë dhe me çfarë çmimi.

/ts