Përgatitet bllok opozitar shqiptar për ta rrëzuar “pushtetin e përjetshëm”të BDI-së..

Tri partitë politike, Alenca për Shqiptarët, Besa dhe Alternativa, nëse bien dakord me njëra-tjetrën, planifikojnë të marrin pjesë në zgjedhjet e ardhshme parlamentare me lista të përbashkëta deputetësh, si dhe të shfrytëzojnë fuqinë politike të Besës në Tetovë dhe të Aleancës për Shqiptarët në Gostivar – shkruan Plusinfo.mk

Se diçka e tillë seriozisht po “zihet”, dëshmojnë thashethemet që janë përhapur në qarqet politike, por edhe disa media tashmë kanë bërë të ditur se së shpejti të tre palët do të nisin ta shkruajnë skenarit të filmit të titulluar “Rënia e pushtetit të përjetshëm”. Një film i cili padyshim nuk do t’i pëlqejë aspak Ali Ahmetit.

Është kërkuar qëndrim nga Afrim Gashi, lideri i Alternativës, parti kjo që aktualisht është pjesë e shumicës qeverisëse dhe që përflitet se së shpejti do t’i bashkohet “paktit të trefishtë”. Por përgjigja ka qenë:

– Nuk kam kohë, çao – duke mos lejuar t’i bëhet pyetja deri në fund.
As Besa dhe as Aleanca për Shqiptarët nuk kanë dhënë përgjigje zyrtare, por Plusinfo,mk jozyrtarisht mëson se tre partitë politike, nëse bien dakord me njëra-tjetrën, planifikojnë të marrin pjesë në zgjedhjet e ardhshme parlamentare me lista të përbashkëta deputetësh, si dhe të shfrytëzojnë fuqinë politike të Besës në Tetovë dhe të Aleancës në Gostivar.

Politologu Dimitar Hristov në një bisedë për Plusinfo,mk ka thënë se është demokratikisht e shëndoshë të shihet se si do të sillet BDI-ja në opozitë.
– Ideja e partive politike shqiptare për t’u bashkuar dhe për të marrë pjesë në koalicion në zgjedhjet e ardhshme parlamentare më tingëllon mjaft e mirë. Duhet të shohim se si do të sillet BDI-ja në opozitë. Do të ishte interesante që deputetët e BDI-së të qëndronin në foltoren e Kuvendit dhe të kritikonin qeverinë.

Por sipas rezultateve të zgjedhjeve të mëparshme lokale, analizat e mia tregojnë se partia e Ali Ahmetit do të ishte sërish fituese absolute. Në anën tjetër, sipas rezultateve të zgjedhjeve të jashtëzakonshme për këshilltarë në Komunën e Tetovës, të mbajtura më 20 gusht, ku Besa fitoi numrin më të madh të këshilltarëve, shihet edhe dobësimi i BDI-së. Mirëpo, këto rezultate në asnjë mënyrë nuk duhet të na verbojnë, sepse nëse e shikojmë daljen prej 35,31 për qind, që është shumë e ulët dhe nuk është faktor për asnjë lloj destabilizimi të partisë së Ahmetit – sqaron Hristov.

Ai kujton se një përpjekje të ngjashme për të bashkuar bllokun shqiptar ka pasur edhe gjatë zgjedhjeve parlamentare të vitit 2016, kur BDI shënoi rezultatin më të ulët në histori, duke fituar vetëm 10 mandate parlamentare.

– Atëherë të gjithë ishim të sigurt se ishte “fillimi i fundit” të BDI-së. Por më pas ndodhi një kthesë e madhe, kur të gjithë menduam se BDI ishte partia e dobësuar, integristët u rikthyen më të fortë dhe menjëherë fituan 15 deputetë në zgjedhjet parlamentare të radhës në vitin 2020. Tani përsëri jemi dëshmitarë të një përpjekjeje të tillë për t’u bashkuar kundër BDI-së. Megjithatë, realiteti është krejtësisht ndryshe.

E gjithë administrata, punësimet partiake, kontratat në komuna dhe ministri, të gjitha këto janë nën mbrojtjen e BDI-së dhe anëtarëve të saj, për të cilët jemi të vetëdijshëm se janë një makinë e madhe kur bëhet fjalë për votën në zgjedhje. Për shkak të këtij fakti dhe gjithë mobilizimit të tyre gjatë zgjedhjeve, nuk na jep as më të voglën shpresë se BDI së shpejti mund të bëhet parti opozitare. Po e them sërish, nga ideja në realizim është një shteg me shumë ferra. Ideja e ribashkimit është realiste, e sinqertë dhe e respektueshme, por realiteti është ndryshe.

Në një të ardhme të afërt nuk do të mund të formohet një qeveri pa BDI-në. Ende nuk ka forcë që do ta mposhte BDI-në në një të ardhme të afërt – sqaron Hristov.
Analisti politik Mersel Biljali nuk beson se mund të krijohet fare koalicion mes Besës, Alternativës dhe Aleancës për Shqiptarët.

– Unë personalisht nuk kam asnjë informacion se aktualisht po zihet bashkimi i Besës, Alternativës dhe Aleancës për Shqiptarët, me qëllim të largimit të BDI-së nga pushteti. Nuk besoj se mund të krijohet një koalicion i tillë për momentin, sidomos jo mes Alternativës dhe Besës, të dala nga e njëjta parti dhe që kanë mjaft mosmarrëveshje për t’i kapërcyer. Natyrisht, këtë informacion e ka plasuar dikush që dëshiron fort bashkimin e bllokut shqiptar kundër BDI-së, por një gjë e tillë në këtë moment nuk është e mundur.

Megjithatë, asgjë nuk duhet përjashtuar kur bëhet fjalë për politikën. Problemi është se nuk kemi ndonjë ofertë serioze nga pala tjetër dhe mendoj se tashmë është humbur shansi për bashkim – ka thënë Mersel Bilalli për Plusinfo.mk.

/ms