Pas pendesës duhet përmisim! Shkruan Fatmir Limani

“Kush pendohet pas padrejtësisë së vet dhe përmirësohet, vërtet, Allahu ia pranon pendesën”, thuhet në suren: El Maide, 5.39.
Nuk ka tekst më domethënës, sesa ky pas pendesës së ish kryetarit të komunës së Kërçovës, që fliste për ndërgjegje, për gabime, dhe për dëshirë që të falë vite jetë për mërgatën, për rininë. Me këtë paraqitje mbyllet kërkimi i fajtorëve dhe kthimi i kokës në të shkuarën, pse komuniteti e humbi drejtimin e Kërçovës.

– “Koka e falur, nuk pritet” – thotë populli, ndaj tash duhet të shohim para. Mirëpo, forca (partia) e tij politike duhet të pendohet gjithashtu, të përmirësohet.
Tash pas humbjes në nivel republikan dhe komunal, duhet të ndërrojë gjuhën politike humbëse të kësaj fushate. Në një mjedis multietnik si ai i Kërçovës, kjo gjuhë vazhdon të përpiqet të ndajë, të përçajë. Ky ishte rasti i reagimit të BDI vendore pas zgjedhjes me 12 vota të Ajhan Sulkovskit në krye të Këshillit komunal.

Si jam zotuar solemnisht, asnjë arritje etnike nuk cënohet, por vetëm konfirmohet.
● Përdorimi i gjuhës shqipe, në Këshill, me gojë, me shkrim, do të vijojë si më parë.
● Përdorimi i flamurit nuk ndryshon gjithashtu. Flamuri do të valëvitet si më parë.

Atëherë ku qendron problemi ? Ajhan Sulkovski është një kërçovar i nderuar, një interpretues i mësim-besimit dhe edukator i shkëlqyer, një urë elokuente e pajtimit mes etnive, një dëshmi e tolerancës shekullore të Kërçovës.

A duhet të bashkëpunojmë ?
Po, pendesa e djeshme është ogur i mirë. Jemi të gatshëm të bashkëpunojmë, mes vedi, dhe me etnitë e tjera.

Prioritet janë projektet tona për spitalin, për infrastrukturën komunale, për aktivizimin e kompanive tona në projektet republikane.
Bashkë për Kërçovën, bashkë për të rikëthyer në gjirin e nënave fëmijët e dëbuar nga vendi, bashkë për rininë !
F. B. L. Shkruan ministri Fatmir Limani në Facebook.

/ms