Pas kërcënimit në Kërçovë reagon dhoma e avokatëve në Maqedoni

Si Zëvendëskryetare e Dhoma e avokatëve e RMV, reagoj me shqetësim të thellë dhe indinjatë të plotë ndaj sulmit dhe kërcënimit serioz që i është bërë avokates Syarta Saliu-Osmani në qytetin e Kërçovës, një ngjarje e rëndë që cenon drejtpërdrejt sigurinë personale, profesionin e avokatisë dhe vetë rendin demokratik.

Ky rast bëhet edhe më alarmant për faktin se avokatja Syarta Saliu-Osmani është këshilltare komunale në Komunën e Kërçovës, çka hap dyshime të arsyeshme se kemi të bëjmë jo vetëm me një akt kërcënimi individual, por edhe me presion, frikësim dhe intimidim me prapavijë politike.

Çdo kërcënim ndaj një avokateje që ushtron detyrën e saj profesionale dhe publike është sulm ndaj shtetit të së drejtës, ndaj përfaqësimit demokratik dhe ndaj grave që marrin role aktive në jetën institucionale dhe politike.
Dhoma e avokatëve e RMV dënon fuqishëm çdo formë dhune, kërcënimi dhe presioni ndaj avokatëve, veçanërisht kur këto akte ndodhin në rrethana që ngrenë dyshime për motivim politik. Askush nuk guxon të frikësojë përfaqësuesit e drejtësisë dhe të zgjedhurit lokalë përmes dhunës apo armëve.

Kërkojmë:
Hetim të plotë, transparent dhe të paanshëm të rastit
Zbardhje të motiveve reale të sulmit
Garanci konkrete për sigurinë e avokates Syarta Saliu-Osmani
Tolerancë zero ndaj kërcënimeve me prapavijë politike
Dhoma e avokatëve e RMV shpreh solidaritet të plotë me avokaten Syarta Saliu-Osmani dhe me të gjithë avokatët që përballen me rrezik për shkak të punës së tyre profesionale dhe angazhimit publik.

Heshtja përballë këtyre rasteve është bashkëfajësi. Avokatët nuk do të frikësohen. Drejtësia nuk do të heshtë.
Me respekt,
Avokatja M-r.Hamdije Ademi Tafa
Zëvendëskryetare e Dhoma e avokatëve e RMV

/tvgurra