Pak gjykatës në Kërçovë, lëndët mbeten pa epilog..! (VIDEO)

Numri i lëndëve në gjykatën e Kërçovës po rritet dita ditës, por zgjidhja e tyre në kohë është e pa mundur për shkak të mungesës së gjykatësve.

Ky problem në Kërçovë ka filluar që në vitin 2020. Avokatët presin në radhë pas dyerve të gjykatave me klientët e tyre, për të përfunduar lëndët të cilat me vite mbeten të pa zgjidhura me vite.

Numri i nevojshëm i gjykatëseve në Kërçovë sipas sistematizimit është 17, por për momentin janë vetëm 7 gjykatës. Gjendja pritet të rëndohet edhe më shumë pasi 3 gjykatës po numërojnë ditët për tu pensionuar.
Avokatët e Kërçovës kërkojnë zgjidhje përmes Odës së Avokatëve të Maqedonisë.

“Gjithsesi kemi ankesa nga klientët, sepse lëndët nuk mund të kryhen në afate ligjore. Jemi drejtuar deri tek gjykata, mirëpo plotësimi i vendeve të lira në gjykatë nuk është nën kompetencë të gjykatës por në kompetencë të Këshillit Gjyqësorë.

Edhe pse gjykatësit e realizojnë normën më shumë se 100%, përsëri nuk mund ta përballojnë numrin e madh të lëndëve. Në këtë kontekst ne si odë e avokatëve jemi drejtuar edhe tek institucionet më të larta me atë që kërkojmë ndryshimin e Ligjit për gjykata, sepse kjo gjendje nuk është vetëm në gjykatën e Kërçovës, por në të gjitha gjykatat në nivel republikan”, tha Hamdije Ademi atafa-zv/kryetare e odës së avokatve në RMV.

Për përmbushjen e numrit të gjykatësve Oda e Avokatëve në nivel Republikan ka dhënë propozim që për gjykatës të zgjidhen edhe avokatët me përvojë, me një trajnim të përshpejtuar.

“Ne si dhomë e avokatëve bëjmë thirrje deri tek Këshilli Gjyqësor dhe tek organet ligjvënëse që të shqyrtojnë kërkesën për ndryshimin e ligjit ku do të mund të zgjidhen për gjykatës edhe avokatët dhe bashkëpunëtorët gjyqësorë që të mos vie deri tek kolapsi gjyqësorë.

Për fund them se kjo mungesë e gjykatësve drejtpërdrejtë edhe neve si avokat na dëmton për shkak se me mungesën e gjykatësve seancat zvarriten dhe zgjasin jashtë normave juridike”, shtoi Ademi.

Përveç kësaj, në Kërçovë nuk ka kuadër që do të zëvendësonte dhe plotësonte vendet e mungesës së gjykatësve dhe atyre që dalin në pension. Këshilli gjyqësor ka shpallur konkurs për zgjedhjen e 31 gjyqtarëve në disa gjykata të vendit, pa Shkupin.

Kandidatët mund të konkurrojnë për gjashtë pozita gjykatësi në Gjykatën e Priliepit, katër në Strugë, nga tre në Manastir dhe Kërçovë, nga dy në Krushevë, Ohër, Tetovë, Dellçevë, Radovish dhe Berovë dhe nga një pozitë në Kumanovë, Strumicë dhe Sveti Nikole.

Konkursi do të shpallet në gazetën zyrtare dhe pritet të shihet nëse gjykatësit do të pranojnë të punojnë në një nga vendet e lartpërmendura. Sipas informacioneve që posedon TV21 nuk ka gjykatës të interesuar që do të linin Shkupin për të punuar në Kërçovë e gjetiu.

VIDEO:

/tv21