Nobelisti i ekonomisë tha se Bitcoin është i destinuar të shkojë drejt zeros..
Eugene F. Fama, ekonomisti fitues i çmimit Nobel i shquar për punën e tij në çmimin e aseteve dhe hipotezën e tregjeve efikase, beson se bitcoin një ditë do të bëhet i pavlerë, raporton PCW.
Duke folur në podkastin Capitalisn’t, Fama u pyet për mundësinë e kolapsit të Bitcoin drejt zeros brenda dekadës së ardhshme. Ai u përgjigj: “Do të thotë me shumë gjasa. Unë ende besoj në politikën monetare. Mbase jam gabim.”
Në lidhje me idenë e presidentit Amerikan Donald Trump për krijimin e një rezerve Bitcoin – një lëvizje e cila shumë besojnë se do ta dërgonte kriptomonedhën më të madhe në botë drejt rekordeve të reja – Fama paralajmëroi:
“Mund të ketë efektin e kundërt. Nëse qeveria nuk është aty, ata mund ta dërgojnë drejt zeros menjëherë.”
Duke refuzuar krahasimet me arin, ai tha: “Është ar dixhital vetëm nëse ka një përdorim. Nëse nuk ka një përdorim, është thjeshtë letër. Madje as letër, është ajër, madje as ajër.”
Skepticizmi i Fama buron nga spekulimi që karakterizon Bitcoin dhe jo vlera e brendshme. Ai theksoi se me një sasi fikse, çmimi udhëhiqet i gjithi nga kërkesa duke e bërë kështu aset të luhatshëm. “Njerëzit nuk duan të bëjnë biznes me diçka e cila mund ti nxjerrë ata prej biznesit për shkak të variacioneve të vlerës së saj,” tha ai.
Ekonomisti argumentoi se bitcoin nuk mund të zëvendësojë paranë tradicionale duke qenë se asetet financiare duhet të ketë një qëllim praktik për të ruajtur vlerën.
Kur u pyet nëse Bitcoin është një flluskë, Fama refuzoi të bënte një parashikim. “Nuk mundem të parashikoj kur do të ndodhë. Shpresoj që të shpërthejë, por nuk e parashikoj dot,” tha ai. Ekonomisti paralajmëroi edhe nëse bitcoin vijon të ruajë vlerë, mund të sfidojë teoritë ekonomike.
“Shpresoj të shpërthejë sepse nëse nuk ndodh, do të na duhet t’ia fillojmë nga e para me teorinë monetare.”
/portalb
