Nisin Kolonat në Zvicër, 9 kilometra pritje para tunelit të Gotthardit

Fundjava e parë e pushimeve verore ka sjellë kolona të gjata automjetesh në rrugët e Zvicrës, veçanërisht në drejtim të jugut të vendit, përcjell albinfo.ch.

Që në orët e para të së shtunës, para portalit verior të tunelit të Gotthardit është krijuar një kolonë prej rreth 9 kilometrash, duke shkaktuar një pritje prej afërsisht 90 minutash, sipas të dhënave të TCS.

Përveç familjeve zvicerane që po nisen për pushime, trafiku është shtuar edhe nga mijëra udhëtarë të huaj që kalojnë tranzit nëpër Zvicër drejt Italisë dhe destinacioneve të tjera jugore.

Për të shmangur bllokimet, autoritetet u rekomandojnë drejtuesve të automjeteve të përdorin rrugën alternative A13 përmes San Bernardinos, e cila në raste të tilla ndihmon në lehtësimin e fluksit të trafikut.

Ekspertët paralajmërojnë se gjatë gjithë fundjavës pritet trafik i rënduar, sidomos në orët e paradites, ndërsa nisja e pushimeve verore në disa kantone zvicerane dhe në rajone të vendeve fqinje pritet të shtojë më tej numrin e automjeteve në rrugë.

/Albinfo.ch