Nga Maqedonia më shum largohen gratë drejt Europës se burrat !?

Edhe pse në të dhënat zyrtare nuk figurojnë analiza të plotë të karakteristikave gjinore të migrimit, pjesërisht për shkak se të dhënat janë të ndryshme dhe nuk ka statistika zyrtare për këtë çështje, analiza të veçanta hedhin dritë mbi profilin gjinor të emigrimeve. Sipas të dhënave të Entit Statistikor flukset më të mëdha migratore ndodhin drejt kryeqytetit Shkup.

Mes viteve 2000 dhe 2015, numri vjetor i grave që shpërnguleshin nga vendet e tjera drejt kryeqytetit ishte vazhdimisht sa dyfishi i numrit të burrave, madje edhe më i madh. Në pesë vitet e fundit, trendi i migrimit të grave vijon të mbetet i lartë, por karakteristikë është se migrimi i burrave është po ashtu në rritje.

Disa të dhëna tregojnë se në valët e mëparshme të migrimit (në vitet 1990, për shembull) mbizotëronin burrat, që ndryshuan një dekadë më vonë (gjatë viteve 2000) dhe veçanërisht gjatë viteve 2010. Për shembull, baza e të dhënave e Institutit për Hulumtime të Punësimit përmban të dhëna të ndara sipas gjinisë të mbledhura nga vendet ku jetojnë shtetasit e Maqedonisë, që tregojnë një përqindje prej 52,4% meshkuj dhe 47,6% femra.

Ndërsa të dhënat nga Eurostat konfirmojnë se flukset e migrimi nga Maqedonia e Veriut drejt vendeve anëtare të BE-së janë në rritje. Shtetasit e Maqedonisë së Veriut përbëjnë 7% të qytetarëve të vendeve kandidate dhe potenciale kandidate, të cilëve u është lëshuar leja e parë e qëndrimit në vendet anëtare të BE-së në vitin 2020.

Ata kanë përfituar 29% më shumë leje qëndrimi të parë në vitin 2020 krahasuar me vitin 2010. “Në fund të vitit 2020, 3.8 milionë qytetarë të vendeve kandidate dhe kandidate potenciale kishin leje qëndrimi të vlefshme në vendet anëtare të BE-së. 5% e tyre, ose afërsisht 190,000 leje qëndrimi të vlefshme, ishin shtetas të Maqedonisë së Veriut. Në të njëjtin vit, 93 mijë qytetarë të vendeve kandidate dhe kandidate potenciale morën nënshtetësinë e një shteti anëtar të BE-së. 5% ose afërsisht 4650 e personave që kanë marrë nënshtetësinë e një shteti anëtar të BE-së ishin nga Maqedonia e Veriut.

Në periudhën nga viti 2010 deri në vitin 2020, numri i qytetarëve nga Maqedonia e Veriut që kanë marrë nënshtetësinë e BE-së është rritur për 52%”, thuhet në statistikat e BE. Flukset emigruese shpjegojnë në një farë mënyre edhe ndryshimet demografike në popullsinë e vendit.

Maqedonia e Veriut ka shënuar rënie të popullsisë çdo vit në periudhën 2010-2020, me përjashtim të viteve 2017 dhe 2018. Këto ndryshime ndër të tjera mund të shpjegohen gjithashtu me rrjedhën intensive të migracionit pas liberalizimit të vizave në BE në vitin 2009 dhe regjimet më të favorshme të migracionit në disa vende evropiane, si Gjermania, e cila inkurajoi familje të tëra të shpërngulen jashtë vendit.

Në të njëjtën kohë, shkëmbimi i studentëve dhe programet e punës dhe të udhëtimit vitet e fundit janë bërë shumë të popullarizuara. Mundësi të tilla ndoshta kanë kontribuar në një ulje të veçantë të popullsisë së dy grupmoshave: 15-19 vjeç dhe 20-24 vjeç”, vërehet në raportin e përbashkët të ESHS dhe nga UN Women “Gratë dhe burrat”.

/(koha.mk)