Nga ish ministri e deri te shitësi i biletave: Këto janë 34 të dyshuarit për zjarrin në Koçan..!?

Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Prokurori republikan, Ljupço Kocevski njoftoi se në 13 vitet e fundit të gjithë këta persona me veprimet apo me mosveprimin e tyre kanë kontribuar në zjarrin tragjik që shpërtheu në diskotekën “Puls” ku humbën jetën 59 persona, transmeton Portalb.mk.

Këto janë të dyshuarit sipas njoftimit të prokurorit.
Ministria e Ekonomisë (5 persona) – ish-ministri, ish-sekretari shtetëror, udhëheqës sektori, udhëheqësi i departamentit dhe bashkëpunëtori i ri për moskryerje të detyrave zyrtare, nuk kanë vepruar sipas rregulloreve dhe rregullave teknike dhe personit juridik të dyshuar që nuk i ka plotësuar kushtet dhe mënyrën për kryerjen e veprimtarisë hotelierike në disa raste me licenca i kanë mundësuar kryerjen e veprimtarive hotelierike – kabare.

Ministria e Punëve të Brendshme (7 persona) – si persona zyrtarë të punësuar në Shtip dhe Koçan kanë përgatitur, nënshkruar dhe miratuar pëlqimin dhe i kanë mundësuar kompanisë që e ka drejtuar diskotekën të marrë licencë për kryerjen e veprimtarisë hotelierike – kabare, edhe pse objekti nuk i ka plotësuar kushtet ligjore për funksionim.

Inspektorati Shtetëror i Tregut (5 persona) – dy ish drejtorë dhe tre inspektorë kanë pasur për detyrë të kryejnë mbikëqyrje inspektuese, nuk e kanë kryer detyrën zyrtare dhe në periudhën nga data 09.01.2020 deri më 16.03.2025, në asnjë moment nuk kanë bërë kontroll të veprimtarisë së personit juridik.

Komuna e Koçanit (3 persona) – ish kryetarët e komunave të cilët nuk i kanë përmbushur obligimet e tyre në përputhje me Ligjin për Mbrojtje dhe Shpëtim. Gjatë gjithë kësaj kohe komuna ka marrë pagesa si kompensim për një objekt hotelerie.

Drejtoria për Mbrojtje dhe Shpëtim (1 person) – ish-drejtor për mospërmbushje të obligimeve të tij në përputhje me Ligjin për Mbrojtje dhe Shpëtim, duke i mundësuar në këtë mënyrë diskotekës “Puls” që në mënyrë të kundërligjshme të vazhdojë të kryejë veprimtari hotelierike.

Kompania e sigurimit (6 persona) – pronari dhe menaxheri, personi i autorizuar i përfaqësisë në Koçan, tre punonjës dhe një person i cili nuk ishte i punësuar, por kryente detyra të caktuara për atë kompani. Ata e kanë siguruar fizikisht objektin pa ndonjë vlerësim apo përgatitje paraprake. Në mbrëmjen e zjarrit ata nuk kanë kontrolluar dhe kanë lejuar hyrjen e fëmijëve, nuk janë kujdesur për tejkalimin e kapacitetit të vizitorëve në objekt, si dhe nuk kanë penguar futjen dhe përdorimin e lëndëve shpërthyese – piroteknike që e kanë shkaktuar zjarrin dhe e kanë shkaktuar fatkeqësinë.

Bendi DNK (1 person) – për sjelljen dhe përdorimin e mjeteve piroteknike.

Kompania pronare e diskotekës (3 persona) – të dyshuarit janë persona përgjegjës, bashkëpronarë ose menaxherë për një periudhë të caktuar kohore në kompaninë e e cila është pronare e diskotekës. Edhe pse objekti ishte i destinuar si objekt për industrinë e lehtë dhe nuk i plotësonte kushtet për t’u shndërruar në objekt hotelierik, të dyshuarit gjatë gjithë periudhës në mënyrë të kundërligjshme kanë marrë licencë dhe kanë organizuar shërbime hotelierike.

Kompania për përpilimin e projekteve (1 person) – pronarja e dyshuar e cila ka përgatitur një projekt bazë si kusht për fillimin e punës dhe kryerjen e aktiviteteve hotelierike – një kabare, edhe pse e ka ditur se nuk ka pasur kushte ligjore që objekti të kalonte nga kategoria e industrisë së lehtë në objekt për kryerjen e veprimtarisë hotelierike.

Shitësi i biletave (1 person) –nuk ka marrë parasysh numrin dhe moshën e të rinjve të cilët janë lejuar të marrin pjesë pa dallim të moshës dhe në kundërshtim me Ligjin për veprimtari hotelierike ka lejuar hyrjen dhe praninë e të miturve në koncert.

Organizatori i ngjarjes – (1 person) – pa kontratë me shkrim të nënshkruar zyrtarisht me grupin muzikor DNK e ka organizuar koncertin dhe së bashku me të dyshuarit e tjerë, edhe pse të vetëdijshëm se kapaciteti dhe kushtet në objekt nuk e kanë lejuar një gjë të tillë, ka lejuar hyrjen e rreth 650 vizitorëve, duke përfshirë këtu të paktën 31 fëmijë.

Në zjarrin e rënë në diskotekën “Pulse” më 16 mars 2025, jetën e humbën 59 persona, midis të cilëve 6 të mitur, u lënduan 196 persona të cilët trajtohen brenda dhe jashtë vendit.
Sipas hetimeve të deritanishme nga institucionet, diskoteka nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.

/portalb