Netanyahu nuk përjashton eliminimin e udhëheqësit suprem të Iranit, Ajatollah Ali Khamenei..!?

Kryeministri izraelit Benjamin Netanyahu ka lënë të hapur mundësinë e eliminimit të udhëheqësit suprem të Iranit, Ajatollah Ali Khamenei, duke deklaruar se një veprim i tillë nuk do të përshkallëzonte konfliktin, por përkundrazi do ta përfundonte atë. Në një intervistë për ABC News, Netanyahu theksoi se vendi i tij është i vendosur të veprojë ndaj regjimit iranian, të cilin e konsideron burimin kryesor të destabilitetit në Lindjen e Mesme.

“Ne po bëjmë atë që duhet të bëjmë,” tha Netanyahu, duke nënvizuar se konflikti me Iranin është thellësisht i rrënjosur dhe se regjimi aktual në Teheran ka përhapur terrorizëm dhe ka ndërmarrë veprime agresive në të gjithë rajonin për dekada.

Sipas tij, eliminimi i Khameneit “nuk do të përshkallëzojë konfliktin, por do t’i japë fund atij,” duke e krahasuar regjimin iranian me “ekipin bërthamor të Hitlerit”. Netanyahu gjithashtu pranoi se Izraeli ka shënjestruar shkencëtarët më të mirë bërthamorë të Iranit, megjithëse nuk hyri në detaje.

Në vijim të intervistës, Netanyahu hodhi poshtë mundësinë e negociatave me Iranin, duke theksuar se “ata duan të zhvillojnë bisedime të rreme ku gënjejnë dhe mashtrojnë, veçanërisht Shtetet e Bashkuara.” Ai deklaroi se shërbimet izraelite kanë informacione të besueshme që vërtetojnë këtë.

Duke iu përgjigjur një pyetjeje mbi retorikën “Amerika e Para” nga krahu izolacionist i kampit të Donald Trump, Netanyahu tha se kërcënimi nuk është vetëm ndaj Izraelit, por ndaj të gjithë Perëndimit. “Ata po bërtasin ‘Vdekje Izraelit, vdekje Amerikës’. Ne po i ndalojmë. Dhe kjo mund të arrijë shumë shpejt në Amerikë,” paralajmëroi ai.

Sipas kryeministrit izraelit, Irani përbën një rrezik të drejtpërdrejtë jo vetëm për Izraelin, por edhe për fqinjët arabë, për Evropën dhe për Shtetet e Bashkuara. “Kjo nuk është thjesht miopi politike,” tha Netanyahu, “por një verbëri absolute përballë një kërcënimi real.

/syri.net