Në tokën e trimave, Garana i dhuron Kërçovës përjetësinë, duke rikthyer Skënderbeun në Uskanë

arana, ky vend i vogël me zë të madh në Kërçovë shkruan historin. Sepse aty ku lartësohet Skënderbeu, thonë që ngrihet Shqipëria. Stërnipi i Skënderbeut, Loris Kastrioti, më 28 Nëntor në Garanë të Kërçovës së bashku me banorët e këtij fshati e personalitete të shquara shqiptare, do të përurojë monumentin e Gjergj Kastriotit.

Një vepër që do të vulosë frymën e qëndresës shqiptare në këtë trevë. Monument madhështor i Heroit tonë Kombëtar, i lartësuar mbi kalë, ngrihet në 6 metra lartësi, duke dominuar kështu, krenar hapësirën e sheshit të fshatit Garanë. Krahas tij është ndërtuar edhe godina e Bashkësisë Lokale, e cila në brendësi do të strehojë hapsirën e kuvendit ku do ekspozohet historia heroike e këtij vendbanimi. Ku, përmes dokumentave, fotografive, dëshmive e shkrimeve historike do rrëfejë epopen e Garanës.

Një vend që brez pas brezi ka mbajtur barrën e mbrojtjes së vatanit në këtë pjesë të Atdheut. Kështu, trimëria e garanasve, e pranishme në çdo etapë, kthehet në një histori të shkruar me përkushtim, nder dhe gjak shqiptari. Ky projekt, si shumë vepra të tjera në këtë fshat, është fryt i bashkëpunimit shembullor mes mërgatës dhe Bashkësisë Lokale, të mbështetur edhe nga afaristët e fshatit.

Duhet theksuar se Garana numëron më shumë firma e biznese sesa të gjitha fshatrat e tjerë së bashku që janë për rreth Kërçovës. Një dëshmi e gjallë se banorët e saj vazhdojnë të jenë qëndrestarë të kohëve moderne, ruajtës të vendlindjes dhe mbështetës të pandalshëm të zhvillimit të saj. Pra, ky memorial nuk është vetëm një monument, por një thirrje për unitet, një pikë referimi për brezat e sotëm dhe të ardhshëm, një dëshmi e lavdisë shqiptare dhe simbol mikpritjes që e nderon këtë vend.

Fshati Garanë dhe i gjithë rajoni i Kërçovës ngre kështu një shtyllë të fortë të trashëgimisë sonë kombëtare, në nderim dhe përkujtim të një figure që mbetet udhërrëfyes i pavdekshëm i qëndresës dhe bashkimit shqiptar.
Në pamundësi për të qenë aty ku nderohet krenaria, me respekt të thellë nga Nju Jorku, shkruan për vëllezërit e mi garanas, Bekim Adili

/tvgurra