Në Maqedoni ajri “VRET” 1632 vite jetë të humbura për 100 mijë banorë..(FOTO)

Lajme nga Maqedonia

Maqedonia e Veriut renditet ndër vendet e para në Evropë sa i përket numrit të viteve jetë të humbura për 100 mijë banorë si pasojë e ndotjes së ajrit.

Këtë tregojnë të dhënat nga “Agjencia Europiane e Statistikave” në raportin monitorues në kuadër të zhvillimit të qëndrueshëm (SDG).

Ky raport, përmes të dhënave pasqyron situatën në të cilat ndodhen vendet sa i përket treguesve të ndryshëm dhe shtron nevojën imediate ndaj shteteve për të punuar për një Europë të qëndrueshme dhe elastike.

Të dhënat tregojnë se për vitin 2019-të, në Maqedoni janë regjistruar 1.632 vite jetë të humbura për shkak të ndotjes së ajrit, apo e katërta në Evropë, pas Bosnjës me rrezik më të madh të ndotjes, Serbisë e dyta dhe Kosovës e treta.

Shkalla e këtij treguesi për 100 mijë banorë në Shqipëri ndërkohë regjistrohet në 1486 vite, apo e shtata në listën e viteve jetë të humbura për 100 mijë banorë si pasojë e ndotjes së ajrit.

Në ndërkohë, mesatarja e Bashkimit Europian për vitin 2019-të regjistrohet 762 vite jetë të humbura për 100 mijë banorë, çka do të thotë se në Maqedoni, ajri vret më shumë se dy herë sesa mesatarja e BE-së.

Por çfarë do të thotë ndotje e ajrit sipas EUROSTAT? Vitet e humbura llogariten si pasojë e ekspozimeve ndaj grimcave të imta – diametri i të cilave është më i vogël se 2.5 mikrometra, që do të thotë se ato mund të barten thellë në mushkëri dhe mund të shkaktojnë inflamacion dhe të përkeqësojnë gjendjen e njerëzve që vuajnë nga zemra dhe sëmundjet e mushkërive.

Sipas “Agjencisë Europiane të Mjedisit”, këto grimca të vogla shkaktojnë vdekje të parakohshme të persona që vuajnë nga sëmundje të mushkërive, por bëhen edhe shkaktare për shumë sëmundje të reja. Kjo lloj ndotje i referohet kryesisht asaj të mjeteve dhe automjeteve.

Shifrat bëjnë me dije se vendet e Ballkanit Perëndimor janë vendet më problematike në këtë drejtim. Katër vendet e para me numrin më të lartë të viteve jetë të humbura për 100 mijë banorë janë Bosnje Hercegovina, Serbia, Kosova dhe Maqedonia e Veriut.

Në nivel rajoni, Shqipëria renditet e fundit, ndërsa në vend të parë në rajon dhe Europë me normën më të lartë të viteve jetë të humbura si pasojë e ndotjes së ajrit është Bosnje e Hercegovina me 1.742 vite. Serbia renditet e dyta dhe regjistron 1.689 vite të humbura 100 mijë banorë, ndjekur nga Kosova me 1.640 dhe Maqedonia e Veriut me 1.632 vite.

Në vend të parafundit në nivel rajoni gjejmë të pozicionuar Malin e Zi me 1.566 vite jetë të humbura për 100 mijë banorë. Në renditjen totale të vendeve të Europës, vendi me normën më të ulët të këtij treguesi është Islanda me 147 vite për 100 mijë banorë dhe Norvegjia me 232 vite për 100 mijë banorë.

Megjithatë, shifrat tregojnë se viti 2019-të regjistron numrin më të ulët të viteve jetë të humbura nga ndotja e ajrit që nga viti 2014-të, i cili regjistronte 1.440 vite.

FOTO: