Në Maqedoni 26 gra janë vrarë gjatë pesë viteve të fundit !?

Nga viti 2021 deri në vitin 2025, në Maqedoninë e Veriut janë vrarë 26 gra. Për shkak të mungesës së një rregullimi të qartë ligjor për shumë vite, nuk dihet saktësisht sa prej këtyre rasteve klasifikohen si femicid.

Rasti më i fundit është ai i 31-vjeçares Rosica Koçeva nga Velesi, e cila u vra nga ish-partneri i saj Ilija Stefanovski, bashkë me babain e saj, pranë shtëpisë. Para vrasjes, Rosica kishte raportuar disa herë kërcënimet dhe dhunën ndaj saj dhe familjes, por institucionet nuk reaguan në mënyrë efektive. Autori kishte marrë vetëm një dënim me kusht dhe ndalim afrimi, të cilin nuk e respektoi. Pas vrasjes së dyfishtë ai vrau edhe veten.

Statistikat tregojnë se gjatë vitit 2025 janë vrarë 6 gra, në vitin 2024 pesë, ndërsa viti 2023 ishte më i rëndë me 9 viktima. Sipas Eurostatit, në vitin 2023 Maqedonia e Veriut ishte ndër vendet me shkallën më të lartë të femicideve në Evropë.

Në vitin 2023, Kodi Penal u plotësua me një dispozitë që sanksionon vrasjen e grave dhe vajzave si pasojë e dhunës me bazë gjinore. Megjithatë, ekspertët theksojnë se problemi kryesor mbetet parandalimi dhe reagimi i pamjaftueshëm institucional ndaj denoncimeve për dhunë.

Aktivistet për të drejtat e grave theksojnë se profesionistët duhet të trajnohen për të identifikuar të gjitha format e dhunës – psikologjike, sociale dhe ekonomike – pasi shumë gra përballen me mosbesim ose dekurajim kur raportojnë rastet në polici.
Një tjetër sfidë mbetet mungesa e kapaciteteve në strehimoret për viktimat e dhunës. Aktualisht në vend ka vetëm 67 shtretër, rreth 37% e kapacitetit që kërkohet sipas standardeve.

/ts