Myftiu i Kërçovës, H. Qamil ef. Rushiti, uron Reisul Ulemanë për titullin “Doctor Honoris Causa”

Reisul Ulema i Bashkësisë Fetare Islame të Republikës së Maqedonisë së Veriut, H. Hfz. Shaqir ef. Fetai, priti në një vizitë urimi Myftiun e Kërçovës, H. Qamil ef. Rushitin, i shoqëruar nga sekretari i Myftinisë së Kërçovës, Xhemail Ahmeti, si dhe veprimtari i mirënjohur i diasporës në Zvicër, H. Enver Fejza.

Me këtë rast, Myftiu H. Qamil ef. Rushiti, në emrin e tij personal dhe të delegacionit, i përcolli urimet më të sinqerta Reisul Ulemasë për nderimin e tij me titullin e lartë akademik “Doctor Honoris Causa”, duke e cilësuar këtë si një mirënjohje plotësisht të merituar për kontributin e tij të vazhdueshëm në udhëheqjen fetare, arsimore, shkencore dhe organizative të Bashkësisë Fetare Islame.

Ai theksoi se ky vlerësim nuk është vetëm një nder për Reisul Ulemanë, por edhe për Bashkësinë Fetare Islame, institucionet e saj dhe mbarë besimtarët, duke dëshmuar respektin dhe vlerësimin që gëzon puna dhe angazhimi i tij në vend dhe në arenën ndërkombëtare.

Duke i falënderuar për vizitën dhe fjalët e ngrohta, Reisul Ulema H. Hfz. Shaqir ef. Fetai shprehu mirënjohjen e tij të thellë për këtë gjest vëllazëror dhe institucional. Ai theksoi se titulli “Doctor Honoris Causa” përbën jo vetëm një nder të madh, por edhe një përgjegjësi të shtuar dhe një motivim të ri për të vazhduar me përkushtim misionin në shërbim të fesë, atdheut dhe shoqërisë.

Në fjalën e tij, Reisul Ulema vlerësoi lart kontributin e Myftinisë së Kërçovës dhe të Myftiut H. Qamil ef. Rushiti, duke theksuar se Myftinia e Kërçovës është një nga faktorët më të rëndësishëm në sukseset, zhvillimin dhe avancimin e Bashkësisë Fetare Islame dhe të institucioneve të saj. Ai shprehu bindjen se bashkëpunimi, uniteti dhe përkushtimi i përbashkët do të vazhdojnë të jenë themeli i forcimit të misionit të Bashkësisë Fetare Islame në të gjitha segmentet e veprimtarisë së saj.

Reisul Ulema shprehu një respekt të veçantë edhe për H. Enver Fejzën, veprimtar i njohur nga Kërçova me veprimtari shumëvjeçare në Zvicër, duke vlerësuar kontributin e tij të çmuar në organizimin dhe fuqizimin e jetës fetare e kombëtare në diasporë. Ai theksoi se H. Enver Fejza ka qenë dhe vazhdon të jetë një aktivist i palodhur, i cili gëzon autoritet dhe respekt të lartë si në mërgatë, ashtu edhe në vendlindje, falë angazhimit të tij të vazhdueshëm në shërbim të vlerave fetare dhe kombëtare.

Në përfundim të takimit, bashkëbiseduesit riafirmuan gatishmërinë për të vazhduar bashkëpunimin e ngushtë në realizimin e misionit të përbashkët në shërbim të fesë, besimtarëve dhe interesit të përgjithshëm të shoqërisë.

Në fund Reisul Ulema në shenjë mirënjohje dekoroi aktivistin e mirënjohur Z. Enver Fejzën për punën e palodhshme me dekoratën “Ikre- Lexo” , ndërsa Myftiut i dhuroi kompletin e botimit voluminoz “Ihtijar” i botuar nga tri bashkësitë islame: e Shqipërisë, Kosivës fhe Naqedonisë së veriut.

/tvgurra