Ministri Fatmir Limani takim me rininë e Kërçovës

Sot nuk u mblodhëm vetëm për të shënuar një përvjetor, por për të reflektuar mbi një rrugëtim të përbashkët, për të ndezur ide të reja dhe për të forcuar një bindje të thellë: se pa rininë, nuk ka të ardhme të qëndrueshme.

Tre vite bashkëveprimi me rininë janë dëshmi e një angazhimi të vazhdueshëm për t’i dëgjuar, për t’i përfshirë dhe për t’i fuqizuar të rinjtë si bashkëkrijues të politikave dhe të së ardhmes sonë të përbashkët.

Si udhëtar i pandalshëm, jam këtu për t’ju ftuar të jemi gjithmonë bashkë në udhëtimin kah e ardhmja.
Brezi juaj ka misionin të definojë çfarë mund të bëjmë bashkë për një të ardhme më të mirë.
Nuk është në lojë pyetja “A jemi mjaft të mëdhenj?”, por “A jemi mjaftueshëm të mençur të bëjmë më të mirën për këtë vend?”.

Kam menduar shumë para se të emërohem ministër, por akoma më shumë mendoj dhe veproj tani, në momente që ndjej se duhet të jemi të gjithë në shërbim të rinisë. Dhe dua të ndaj me ju disa prej përfundimeve të mia:
Investimi në rini nuk është zgjedhje politike, por detyrim kombëtar; se besimi i tyre fitohet me vepra dhe se e ardhmja ndërtohet vetëm atëherë kur të rinjtë ndihen të dëgjuar, të përfshirë dhe të vlerësuar si partnerë të barabartë në këtë rrugëtim.
Dua të mbetem luftëtar i rinisë, bashkë me ta, të trasoj rrugën e të ardhmes këtu, ku kanë lindur dhe prehen të parët tanë.
T’i dhurojmë fuqi zërit rinor, i cili duhet të shurdhojë me forcën e vet çdo vesh politikani, duke i bindur që rinia luan rolin e promotorit të çdo procesi të filluar.
Në çdo sy të ri shoh një të ardhme më të ndritur për vendin më shumë jetë, më shumë shpresë dhe më shumë mundësi.
Por le të jemi të sinqertë: sfidat janë reale. Shumë të rinj përballen me pasiguri, me mungesë perspektive, madje edhe me mendimin për t’u larguar.
Prandaj, unë jam këtu sot për të ndërtuar besim. Jam këtu për të qëndruar krahas rinisë si partner, si mbështetës dhe si garant i një drejtimi të qëndrueshëm.
Ky është angazhimi im.

Të krijojmë hapësira ku të rinjtë do të ndërtojnë. Të investojmë në arsim cilësor, në mundësi punësimi dhe në iniciativa që i mbajnë të rinjtë të lidhur me vendin e tyre.
Të ndërtojmë një vend ku rinia nuk largohet, por zgjedh të qëndrojë sepse këtu gjen dinjitet, mundësi dhe shpresë.
Sepse e ardhmja nuk ndërtohet diku tjetër.
Ajo ndërtohet këtu. Me ju.

/ms