Ministri Fatmir Limani rikthen Burim Mustafën në detyrën e tij

Pas lajmeve për shkarkimin e Burim Mustafës nga posti i udhëheqësit të Fondit për Sigurim Pensional dhe Invalidor në Kërçovë, ministri Fatmir Limani ka reaguar fuqishëm duke e quajtur këtë veprim të nxituar dhe të papranueshëm.

Në një deklaratë të fortë, ai theksoi se vendimet e marra nga inati dhe kapadahillëku gjithmonë përfundojnë me “përplasje hundësh në dysheme”.

Limani paralajmëroi se emërimet tendencioze mund të bëhen lehtësisht, por shkarkimet e padrejta nuk mund të kapërdihen, aq më tepër kur zgjasin më pak se 24 orë. Pas një takimi të rëndësishëm, ai konfirmoi se Burim Mustafa do të rikthehet në detyrën e tij sepse, siç u shpreh ai, “ndryshe s’bën dhe s’do bëhet!”

“Vazhdojmë me maturi, urtësi dhe krenari të merituar,” përfundoi Limani, duke lënë të kuptohet se ky nuk do të jetë fundi i betejës për pozicionet kyçe në institucione.

/ms